Pizza Rizzo stal frá mér Kr. 6.540

Uppáhalds pizzustaðurinn minn á Íslandi var eitt sinn Pizza Rizzo.
Ég hætti alveg að skipta við aðra pizzustaði eftir að ég uppgötvaði ljúffengu eldbökuðu pizzurnar hjá Rizzo.
100 metra frá húsinu mínu er Dominos Pizza, aðeins lengra frá er hægt að finna Hróa Hött, og Wilson's Pizza er handan við hornið, en ég fór alltaf sérstaka ferð í hraunbæ til þess að sækja tvær 12" pizzur sem ég pantaði í síma hjá Rizzo handa mér og konunni minni. Ég var meira að segja búinn að prófa alls konar áleggskómbós og fann hina fullkomnu: pepperóní, rauðlaukur, ólífur og rjómaostur! Mæli með henni! En ekki hjá Pizza Rizzo!
Ástæðan fyrir því er að í nóvember á síðasta ári, stuttu eftir að Ísland fer á hausinn, þá ákveð ég að splæsa eina pizzu á útlenskan verktaka, sem var búinn að vinna fyrir okkur í nokkra mánuði, af því að hann átti afmæli. Ég fer með hann á Rizzo og ákveð að fá hádegistilboð handa okkur báðum, svona til að spara pening. Það var 12" pizza og drykkur á 1190 kall. Ekki svo slæmt fyrir ljúffenga pizzu og 0.5l af pepsí. Á meðan við vorum að panta spyr maðurinn við kassann hvar við séum að vinna, hann hafi séð svo marga útlendinga, eins og þennan sem var með mér, koma á staðinn og borða pizzu. Ég svaraði að ég ynni hjá fyrirtæki x og að þessi maður væri verktaki hjá okkur. Ég rétti honum svo debetkortið mitt á meðan við spjölluðum. Hann rennir því í gegnum posan, tvisvar eða þrisvar og heldur áfram að spjalla um að hann hafi verið í Pakistan eða Afghanistan eða eitthvað álíka og að hann þekki þetta svæði þarna, þaðan sem verktakinn kemur. Svo fer hann yfir á hinn kassann og rennur kortinu mínu í gegnum þann posa líka. Hann útskýrir ekki af hverju hann fer á annan posa. En af hverju ætti mig að gruna eitthvað? Maðurinn er vingjarnlegur og brosleitur, og svo erum við nú á Íslandi þar sem allir eru svo heiðarlegir, er það ekki? Og ég hugsaði mér bara að það væri eitthvað að posanum. Hann heldur meira að segja áfram að spjalla við okkur á meðan við erum að borða pizzuna sem hann seldi okkur.
Viku seinna fer ég yfir debetkortayfirlitið mitt í netbankanum og tek eftir að það eru þrjár færslur frá Rizzo þann 18.11.2008, og eru úttektirnar allar gerðar á uþb 1 mínútu. Fyrstu tvær færslurnar hljóða upp á Kr. 3.270,- og sú þriðja Kr. 2.380,- (2 x 1.190,-, semsagt hádegistilboðin).
Eins og sést á myndinni sem fylgir (úr netbanka Íslandsbanka), þá eru þetta 3 mismunandi færslur (númer 3016304, 3028221 og 1002600), þær eru skráðar á mínútu millibili (13:04:29, 13:03:23 og 13:03:23) og koma frá tveimur posum (posa númer 964607500010001 og 964607500010002).
Ég sannfærði sjálfan mig um að posinn hafi verið bilaður og hafi óvart tekið af mér 2 x 3.270,- þannig að ég prentaði út kvittanirnar þrjár úr netbankanum og fór með þær á Pizza Rizzo. Þar var ung stelpa að afgreiða, þannig að ég bað um að fá að tala við þann sem réði. Hún sagði mér þá að eigandinn væri ekki við en að hún gæti kannski aðstoðað. Ég útskýrði fyrir henni hvað hafði gerst og sýndi henni kvittanirnar sem sönnun. Hún var mjög skilningsrík og sagði meira að segja að þetta hafi gerst oft áður! Hún tók kvittanirnar, sem ég hafði skrifað GSM númer, nafn, kennitölu og reikningsnúmer á svo að eigandinn gæti nú borgað mér til baka, og sagðist ætla að láta eigandann fá þær.
Eftir viku var ekkert komið inn á reikninginn minn, þannig að ég ákveð að fara þangað aftur með, og aftur með netbankakvittanir handa þeim. Aftur lendi ég á mjög vingjarnlegum og skilningsríkum starfsmanni, sem lofar að láta eigandann hafa kvittanirnar.
Viku seinna var ekkert komið inn á reikninginn.
Nú var ég búinn að gefa þeim tvö tækifæri til þess að leiðrétta "mistökin" en ekkert gerðist.
Þá ákvað ég að hringja í neytendasamtökin sem "vinna fyrir þig"! Mjög vingjarnleg kona ráðlagði mér að tala við þjónustufulltrúa í bankanum mínum. Það ætti að vera hægt að fella niður þessar tvær greiðslur af því að þær væru augljóslega rangar.
Ég hringdi þá í útibúið mitt og fékk enga hjálp. Mér var sagt að af því að þetta var debet kort sem ég greiddi með, þá þyrfti ég að fá peninginn til baka frá Pizza Rizzo, og í versta falli kæra fyrirtækið.
Ég hringdi þá aftur í neytendasamtökin og spurði hvort ég gæti kært pizzustaðinn. Konan sem ég talaði við sagðist geta útvegað mér lögfræðing án kostnaðar, en þá þyrfti ég að gerast meðlimur samtakanna. Félagsgjaldið er 4.300,-. Ekki svo mikið fyrir ársgjald, en ég var að reyna að fá til baka 6.540,- (prinsippmál hjá mér) þannig að 2.200 krónurnar sem ég fengi nettó yrðu ekki þess virði að fara í mál.
Ég ákvað þá að ekki eyða meiri tíma í þetta, en í staðinn segi ég öllum sem ég þekki frá þessu og bið þau að sniðganga alla Pizza Rizzo veitingastaðina. Fyrir stuttu rakst ég á þessa vefsíðu þína, og ákvað að dreifa boðskapnum áfram til þín.
Svona sé ég þetta fyrir mér: maðurinn á pizzustaðnum hefur væntanlega haldið að ég væri moldríkt kapitalistasvín með fyrirtækjakort og að það væri allt í lagi að stela smá pening frá fyrirtækinu sem ég vinn fyrir. Hann rennur kortinu í gegn á posa #964607500010002, slær inn 3.270,- og sendir það tvisvar. Færir sig svo yfir á posa #964607500010001 og slær inn rétta upphæð 2.380,-. Hann var svo snöggur og lipur við að gera þetta, að hann er greinilega æfður posaþjófur.
Kveðja,
Halldór