Að borga fyrir að borga

Hér er smá ábending.
Hér á heimilinu var að detta inn um lúguna Álagning vatns- og fráveitugjaldayfirlit.
Ég rak augun í eitt atriði sem ég er alls ekki sáttur við en þar sem um OR er að ræða ætti það ekki að koma á óvart.
Á seðlinum stendur: „Ofan á mánaðarlega greiðslu leggst tilkynningar- og greiðslugjald kr. 87,- þar af er vsk. kr. 18,-“
Ef við reiknum með 100 þúsund heimilum í viðskiptum við OR er þetta dágóð summa sem verið er þarna að rukka neytendur um mánaðarlega og það fáránlega er að það er ekki hægt að túlka þetta öðruvísi en svo að nú eigi almenningur, neytendur, að borga fyrir að greiða reikningana frá OR! Reikninga sem í flestum tilfellum fara sjálfsagt í heimabanka og áreiðanlega drjúgur hluti í greiðsluþjónustu. Mér reiknast svo til að þarna geti verið um 100 milljónir á ári að ræða. Og ef þetta er ekki að koma aftan að neytendum þá veit ég ekki hvað á að kalla þetta.
Er þetta heimilt?
Allavega er þetta ekki í lagi. Það er að minsta kosti klárt að ef OR þarf einhverntímann að kaupa þjónustu af mér þá hlýtur mér að vera heimilt að skella svona 10 þús kall ofan á reikninginn svo þeir allra náðarsamlegast fái að borga.
Vildi vekja athygli á þessu.
Með kveðju,
Þorsteinn Úlfar Björnsson

Siliconhosur fyrir Ford Transit

Mig vantaði síliconhosur fyrir tvo Ford Transit Connect bíla sem ég á.
Þessar hosur eru fyrir "intercoolerinn" og eru 2 stk í hvorum bíl.
Þannig að mig vantaði 4 hosur. Þetta eru ekki stórar hosur, lengd:
13-14cm og 5,1cm í þvermál:
http://cgi.ebay.co.uk/BLACK-2-51mm-ID-Silicone-BELLOW-HUMP-HOSE-Turbo-/270685361766?pt=UK_CarsParts_Vehicles_CarParts_SM&hash=item3f061ad666#ht_1996wt_905

Ég hringi í Brimborg og fæ upplýsingar um verð og þeir segja að
stykkið kosti tæpar 18.000- krónur. Sem sagt rúmar 70.000- krónur fyrir 4 stk.
Ég þakka bara fyrir upplýsingarnar og fer á Netið þegar heim er komið.
Eftir smá leit og eftir að hafa skoðað nokkur spjallborð þar sem
umræðuefnið er um Ford, þá finn ég þessar hosur (ekki original) heldur
frá framleiðanda sem heitir VIPER Performance. Mikið var mælt með þeim
á síðunum og meira að segja sagðar mun betri en þessar frá Ford. Ég slæ
til og kaupi þær á eBay UK og fékk þær sendar heim að dyrum nú í dag.
Heildarkostnaður með öllum gjöldum og VSK fyrir 4 stk... og haltu
þér: 26.400-ISK, s.s. stykkið til mín á um 6.600- kr.

Álagning bílaumboða og annara smásala hér á landi er að drepa alla
verslun í landinu. Ekki dettur mér í hug að versla varahluti í bílinn
minn framar hér á landi. Sest bara fyrir framan tölvuna og panta þetta
og bíð svo bara rólegur í sófanum eftir að pósturinn kemur með þetta
heim til mín.

Kveðja,
Arnar

Blue Lagoon vörur í Danmörku

Ég er búsett í Danmörku og var að versla í súpermarkaði þegar ég rakst á Blue Lagoon vörurnar. Full af hinu íslenska þjóðarstolti fór ég að skoða vörurnar nánar en vissi ekki hvort ég ætti að hlæja eða gráta þegar ég sá verðmiðann; 50 kr. Skv. Myntbreytu Íslandsbanka eru það 1.022 íslenskar kr. Ástæða þess að ég brást svona við er að um jólin keypti ég kísilmaskann frá þeim heima á Íslandi og borgaði 6.500 isk. fyrir hann. Ég er bara ekki að skilja hvernig stendur á því að ég fái íslenska vöru svona miklu ódýrari í Danmörku?! Er svona mikil álagning á þessu eða hvað er eiginlega í gangi? Þess má geta að á vefsíðu Bláa lónsins er gefið upp verðið 60 Evrur á kísilmaskanum, en það eru rúmar 9000 kr!
Bestu,
Hrefna Rós

Dorothy Perkings - Ísl vs. UK

Ég var á rölti í Smáralindinni á dögunum og kíkti inn í tuskubúðina Dorothy Perkins sem er hluti af breskri keðju (í eigu Baugs ef ég man rétt). Þar voru bolir með breskri merkingu "2 for 12£" sem á gengi dagsins í dag gera 2215 kr. Íslenska verðið: 2495kr fyrir EINN bol!
Flutningskostnaður? Tollar? Gengi? Þætti fróðlegt að heyra útskýringuna á þessum rosalega verðmun.
Anna

Strákarnir okkar í HD

Stöð 2 náði útsendingarrétti af HM í handbolta eins og þekkt er orðið.
Auglýsa grimmt þessar útsendingar og klikkja svo út að þeir sendi út
íslensku leikina í HD. Ég kaupi aðgang að Stöð 2 Sport til að fylgjast
með strákunum okkar. Þetta er eina stöðin sem ég kaupi af 365 miðlum. Svo
byrjar þetta og þá sé ég að útsendingin er ekki í HD. Hringi daginn eftir
(laugardaginn 15. janúar) og er þá sagt að ég þurfi að kaupa Stöð 2
Sport 2 til þess að sjá leikina í HD. En ég hef hvergi séð þetta
auglýst svona, skoðaði heimasíðuna þeirra og þetta kom ekki fram þar,
nema þá vel falið í ósýnlega smáaletrinu þeirra. Mér finnst þetta
vera til háborinnar skammar en lýsir kannski viðskiptasiðferði
þessarar stofnunar.
Kjartan Þór Guðmundsson

Dónaskapur á verkstæði Pfaff

Ástæðan fyrir því að mig langar til að setja inn innlegg hérna er sú að fyrir stuttu keypti ég Sennheiser heyrnatól í Elko, ekkert merkilegt með það annað en að mánuði seinna þá var snúran við jackinn orðin ber sem þýddi að eftir örlitla notkun í viðbót færi hún í sundur og það þyrfti að skifta um jack (sem er ekkert mál og ég myndi bara gera það sjálfur en vírarnir voru þannig að það reynist erfitt.)
Allavegana þá fer ég niður í elko og bið um annaðhvort viðgerð eða ný heyrnatól þar sem ég var bara búinn að eiga þau í mánuð. Starfsmaður Elko segir að það þurfi að senda þau í Pfaff þar sem þeir eru með umboðið fyrir Sennheiser og segir að ég get farið með þau sjálfur niður eftir svo þetta taki styttri tíma. Ekkert mál, ég geri það og bíð eftir afgreiðslu í Pfaff og þegar kemur af mér er ég sendur niður á verkstæði (orðin dálítið pirri pirr á að skutlast út um allt.) Ég geri það og á verkstæðinu mætir mér starfsmaður sem veit ekkert og segist þurfa að spyrjast fyrir um þetta. Ég bíð eftir öðrum starfsmanni sem kemur til baka og horfir í augun á mér og segir "Nei við tökum ekki við þessu" ég segi undrandi "nú? afhverju ekki, ég er búinn að eiga þau í mánuð og snúran er ber.." Varstu í flugvél? segir hann með dónalegum tón.
Nei. svara ég og segi að ég nota þau bara í vinnuni.
Þá rífur starfsmaðurinn upp snúruna og opnar hana enn frekar og þar afleiðandi ekki nokkur leið fyrir mig að reyna að halda þessu saman með teipi sem var plan B hjá mér. Hann segir "þetta er það sem þú ert búinn að vera að gera og þar afleiðandi er þetta þér að kenna og við lögum þetta ekki."
Ég segi nú bara satt að ég er búinn að vera í víðum vinnubuxum og enginn óvenjulegur tegjanleiki eða óvenjuleg notkun á tólunum. Hann segist ekki trúa mér og tekur dæmi um það að ef hann kaupir bíl og klessir hann á vegg þá á hann engan rétt á að láta gera við hann.
Sem er svo sem rétt en þetta dæmi er bara ekkert í samanburði við heyrnatól og í þokkabót er hann með dæmandi augnaráð og dónaskap allan tímann.
Þetta gerði mig mjög reiðann og ég strunsaði út og núna eru heyrnatólin bara uppí hillu.
Ég hefði bara sætt mig við það allt saman með engum pirring hefði hann sagt "við getum gert við heyrnatólin fyrir þig fyrir þetta verð ..bla bla bla..
en því miður getum við ekki gert það frítt þar sem ábyrðin nær ekki yfir svona skemmd." Sem myndi bara láta mig segja "léleg heyrnatól þar sem það er bara hægt að nota þau í mánuð og svo þarf að gera við, takk og bless."
Ultimate niðurstaða er sú að ég versla aldrei við Pfaff þar sem bara dónaskapur mætir manni þar.
-Aron

Dýr skyndibiti í Hafnarfirði

Mér er farið að ofbjóða hvað sjoppur bæjarins eru farnar að rukka fyrir sveittan skyndibita. Í gær var ég seint á ferðinni og ákvað að kaupa 2 hamborgaratilboð í einni af sjoppum Hafnarfjarðar. Ég byrjaði á Holtanesti, þar kostaði þessi týpíski pakki, hamborgari, franskar og 0,5 ltr. gos rétt undir 1000 kr. Ég gat ekki ímyndað mér að þessir borgarar væru 2000 kr. virði, svo ég fór á Jolla í Hafnarfirði, þar kostaði alveg eins tilboð yfir 1000 kr. og mér hreinlega ofbauð. Ég endaði á Snælandsvídeó þar sem nákvæmlega eins samsett tilboð er á 650 kr. Þetta er nánast orðið jafndýrt og á veitingahúsum og engan veginn þess virði.
Hafdís

Innleggsnóta eða endurgreiðsla?

Kveikjan af þessum skrifum eru kaup sem ég gerði í ónefndri tækjaverslun
útí Ameríku í sumar. Ég var beðinn um að kaupa ljósgrænan ipod touch af
systur minni. Mér varð á og keypti óvart bláan ipod touch. Þegar ég kom í
búðina sem seldi mér vöruna var mér sagt að því miður ættu þeir ekki til
ljósgrænan ipod. Andskotinn, hugsaði ég með mér. Sit ég þá uppi með 30.000
króna inneignarnótu í einhverri tækjabúð sem ég get ekki notað á næstunni.
(ATH: Þetta var ekki apple store heldur önnur búð).
Þegar ég hafði bitið í vör mína og ætlaði að sætta mig við tapið spurði
afgreiðslumaðurinn hvernig ég vildi fá endurgreiðsluna. Ég var hvummsa og
spurði hvort ég hefði val. Já sagði hann. Þú getur valið hvort þú vilt fá
peninginn til baka, inneignarnótu, aðra vöru eða endurgreitt inná
greiðslukort. Ég valdi peninginn og fór þarna út sæll og glaður.
Þegar ég kom heim ákvað ég að gera smá tilraun. Ég fór í nokkrar verslanir
á höfuðborgarsvæðinu eingöngu í þeim erindagjörðum að versla vörur til að
skila næsta dag. Ég sé ekkert athugavert við þetta, vörurnar voru í
upprunalegum umbúðum og ég var með kvittun með mér í öllum tilvikum.
Niðurstöður voru sláandi. Allar verslanir nema tvær bjóða eingöngu uppá
innleggsnótu. Ég ætla ekki að segja hvaða búðir bjóða uppá innleggsnótu en
þær búðir sem bjóða uppá endurgreiðslu eru verslanir Elko og Toys r us.
(Mér skilst að Ikea geri það líka ef þú ert með kvittun og varan er í
upprunalegum umbúðum)
Hver hefur réttinn hérna? Auðvitað ætti neytandinn að hafa réttinn og
valið um það hvernig hann vill fá endurgreitt ef hann hefur ekki þörf eða
not fyrir vöruna og uppfyllir öll skilyrði fyrir vöruskilum. En því miður
er það ekki svo á Íslandi í dag. Það virðist hafa skapast sú hefð í
íslenskum verslunum að skikka neytendur til að versla við ákveðnar
verslanir einkum ef viðkomandi fær hlutinn að gjöf þá ertu neyddur til að
versla við ákveðið fyrirtæki. Þú átt að hafa val um það hvar þú vilt
versla og hvað þú vilt versla en því miður er það ekki svo á Íslandi í
dag.
Er ekki kominn tími á breytingar?
Nafnleysingi

Óánægð með skóviðgerð

Ég hef nú ekki skrifað hér áður en verð að koma því á framfæri sem ég upplifði um daginn, október 2010. Þurfti að láta setja nýja rennilás á leðurstígvél sem ég er búin að eiga í nokkur ár og var bent á skóvinnustofu Hafþórs í Garðastræti. Fór þangað og maðurinn sem afgreiddi mig sagði að það kostaði 7000 kr að setja rennilás í bæði stígvélin. Fannst þetta svoldið dýrt en sló til þar sem mikið var eftir stígvélunum, ég var beðin um að borga fyrirfram helming eða allt sem ég og gerði. Kom svo c.a. viku seinna og náði þau. Tveimur viku seinna tek ég eftir að rennilásin er að losna frá leðrinu á smá bút greinilega verið of grunnt saumað. Fór með þau og sá sami og ég hafið talað við áður lagaði þetta eins og skot. En þar með byrjaði ballið þegar ég er búin að vera í þeim í 1-2 vikur tek ég eftir að rennilásin er að byrja að rifna á sama stigvéli og var áður til vandræða. Fór með þau eins og skot og fékk vægast sagt ömurlegar mótttökur, dylgjur um að þau hlýtu að vera of þröng. Mátaði þau á staðnum og þar með var það úr söguni. En að þeir vildu taka ábyrð á að rennilás sem var settur í mánuði áður af þeim væri gallaður, kom ekki til mála. Buðu mér að laga þetta fyrir 6000 kr, þar sem að setja rennilás í kostaði nú 8400 kr - sem sagt, hafði hækkað um 1400 kr á einum mánuði, góð verðhækkun það. Eftir þras og rifildi þar sem ég vildi láta þá bera ábyrgð á sinni vinnu og laga þetta mér að kostnaðarlausu, sem kom ekki til mála, strunsaði ég út og var illilega misboðið og mun ekki eiga viðskipti við þá aftur og reyni að segja sem flestum frá þó ekki væri nema frá verðhækkununi.
Bestu kveðjur, Ingibjörg

Breytingagjaldið hjá Icelandair

Ég er námsmaður í Noregi. Og ef ég ætla breyta flugmiðanum mínum frá Noregi til Íslands þá þarf ég að borga 20 þús breytingagjald af því ferðalagið byrjar í Noregi. Hefði flugið byrjað á Íslandi er það 10 þús.
Þeir bera fyrir sig “gamla gengið” en það er ekkert gamalt gengi. Íslenska krónan hefur ekki verið 10 vs þeirri norsku í yfir 4 ár amk.
Geir

Jólagjafaskil Ikea

Fór í Ikea í dag til að fá skipt jólagjöf. Þar sem nú er hafin útsala (hófst strax á fyrsta opnunardag eftir jól) neitar Ikea að taka við vörunni á því verði sem hún var keypt á nema að ég geti sýnt fram á það með kassakvittun. Ekki frekar en aðrir hef ég enga kvittun við hendina og kann illa við að biðja um hana frá gefanda. Þrátt fyrir að eiga smá spjall við annars almennilegan starfsmann þá var ákvörðun Ikea ekki hnikað. Ótrúlega slakt hjá þeim að gefa ekki fáeina daga fyrir vöruskil og þá á því verði sem upphaflega er greitt er fyrir. Ég hafði því miður ekki aðra möguleika en sætta mig við þessa meðferð en ákvað að stoppa eins stutt við og mögulegt var.
Ég mun í ljósi þessarar reynslu frábiðja mér frekari gjafir frá Ikea og reyna eftir fremsta megni að forðast að eiga viðskipti við þessa verslun í framtíðinni.
kveðja,
Magnús

Í stappi við Eymundsson

Þannig vildi til að sonur minn fékk tvö stykki af sömu bókinni í
jólagjöf. Önnur var keypt norður í landi en hin hjá Eymundsson. Þar
sem við búum í Reykjavík var það augljóst að við myndum skila bókinni
sem keypt var í Eymundsson. Sú bók var reyndar ekki með skilamiða en
var þó með verðmiða merktum Eymundsson upp á 3990,- .
Í gær, fyrsta opnunardag eftir jól fór ég í Eymundsson í Kringlunni.
Þar átti ég að fá inneignarnótu upp á 3190,-. Ég var ekki sátt við það
þar sem verðmiði sýndi að bókin var keypt á 3990,-. Ég fékk þau svör
að núna væri bókin á tilboði og að þessi bók hefði örugglega verið
keypt á því tilboði þótt það væri enginn miði á henni sem gæfi það til
kynna. Enn var ég ekki sátt við þessi vinnubrögð því ég taldi að
verðmiðinn hlyti að gilda en þá var mér sagt að það væri ekkert hægt
að gera því afgreiðslukerfið byði ekki upp á annað en tilboðsverðið.
Ég tók því bókina.
Í dag hringdi ég í fyrirtækið og fékk samband við mann sem ég fékk að
kvarta við. Hann tók vel í erindi mitt og sagði það vera alveg ljóst
að ég ætti rétt á að fá inneignarnótu samkvæmt því verði sem á bókinni
væri. Hann sagðist ætla að hafa samband við Eymundsson í Mjódd, bað
mig um að senda kveðju frá sér til verslunarstjórans og sagði að hún
myndi leysa úr þessu fyrir mig.
Ég fór því seinnipartinn og bað um að fá að tala við verslunarstjórann
í Eymundsson í Mjódd. Þá kom í ljós að hún hafði ekki fengið nein
skilaboð og þegar á reyndi náði hún ekki í þann mann sem hafði lofað
mér úrlausn mála fyrr í dag. Hún sagðist einnig ekki geta látið mig fá
rétt verð á bókinni þar sem hún hefði ekki heimild til þess, þeim væri
hreinlega bannað að setja annað verð en tilboðsverðið.
Þetta var því tilgangslaus ferð fyrir mig í annað skiptið á tveimur
dögum. Ég sé því fram á að þurfa enn og aftur að hringja í Eymundsson
á morgun til þess að kvarta. Og væntanlega þarf ég þá í þriðja skiptið
að fara í Eymundsson bókabúðina til þess að skila einni bók.
Það sem upp úr stendur er þetta:Í fyrsta lagi hugsa ég til allra
þeirra sem fengu bækur í jólagjöf keyptar í Eymundsson og eru að skila
þeim núna. Þeir eru væntanlega flestir með skilamiða á bókunum sínum
en ekki verðmiða sem þýðir það að Eymundsson kemst upp með að láta
fólk fá inneignarnótur fyrir lægri pening en var hugsanlega eytt í
jólagjöfina. Í öðru lagi hef ég ekki mikinn áhuga á að versla meira
við Eymundsson eftir að hafa lent í þessu enda hafa þeir ekki mikinn
áhuga á að koma á móts við mig sem viðskiptavin. Sumir hugsa kannski
að þetta sé skitnar 800,- kr. en safnast þegar saman kemur. Fyrir mér
er þetta prinsipp mál. Rétt skal vera rétt.
Kveðja, Ástríður M. Eymundsdóttir

Að skila skóm í Útilífi

Ég var að koma úr Kringlunni þar sem ég skilaði einni gjöf sem hún móðir mín gaf mér, en það voru Viking lágir gönguskór, inn í búðini stóð 18.990kr sem verð á skónum...
Ég ákvað að skila þeim og fékk því innleggsnótu, og á henni kemur fram að inneign mín sé 15.192 kr var nú ekkert að taka neitt rosa eftir þessu fyrr en ég tók miðan upp er heim var komið...
þá er þetta sett upp að varan kosti 18.990 kr og svo kemur eithvða sem mér sýnist ekki vera neitt annað en þjófnaður.... og þeir kalla á sneplinum Línuafsláttur upp á 3.798 kr.
Ég á nú efitr að tékka hvað hún mamma borgaði fyrir skóna, en mér fynst það nú ansi ríflega ef að búðin sé að taka hátt í 4 þúsund krónur fyrir það eina að geyma peningana mína...
Væri gaman að vita ef að fleiri hafa lent í þessu eða fá svör frá versluninni um hvað þessi línuafsláttur til þeirra sé.... en þetta var í Útilíf í Kringlunni.
Með kveðju, Kristján R

Græðir Hagkaup á jólagjafaskilum?

Fór og skilaði dóti í Hagkaupum, þann 27. des. s.l. sem barnið mitt
fékk í jólagjöf, sem er nú ekki frásögu færandi nema fyrir þær sakir
að þegar varan er stimpluð inn í kassann kemur upp að ég eigi að fá
3.990 kr. í inneign. Það vildi svo skemmtilega til að verðmiðinn var
enn á dótakassanum (sem er nú iðulega ekki á gjöfum) en þar stóð 5.990
kr. Ég benti á þetta og þetta var leiðrétt eins og skot.
Fór að velta því fyrir mér hvort þetta hafi verið einstakt tilvik eða
hvort þetta sé auðveld leið til að græða?
Það hefur nú ekki alltaf verið talið kurteisi að spyrja hversu dýrar
gjafirnar eru sem maður fær, en það er kannski ekki óvitlaust?
bestu kveðjur og þakkir
:)
Blær

Kreppugler= Zenni Optical með álagningu

Mér fannst Kreppugler mjög sniðugt þegar það kom fyrst, en svo eftir að hafa lent í miklu veseni með að fá gleraugu bætt sem voru gölluð þaðan (endaði með að ég gafst bara upp, fékk ekkert nema dónaskap og leiðindi) fór ég að skoða þetta aðeins, og sá hér á okursíðunni um grun aðila nokkurs að það væri verið að scrape-a (http://okursidan.blogspot.com/2010/10/kreppugler-ea-bara-ny-afer-vi-hafa.html) þar sem þeir slá inn pöntun á síðu eins og zennioptical.com og afgreiða það svo sem sína eigin pöntun, en tala svo um á sínum síðum að þetta sé beint frá byrgja, það er kannski hægt að túlka það sem tæknilega rétt en mér finnst það samt óheiðarlegt.
Ég fór að skoða gleraugnaboxið sem ég fékk gleraugun mín send í og viti menn, það stendur Zenni Optical á því. Ég er ekki lengur í nokkrum vafa á að þetta sé scraping og bara vel smurt á, t.d. eru gleraugu sem ég pantaði frá zennioptical.com á 10.040 kr komin til landsins með sköttum og öllu saman, en nákvæmlega sömu gleraugu með sömu aukahlutum, glerjum og öllu kosta tæp 20 þús á kreppugler. Ég vil hvetja fólk til að versla frekar við Zenni Optical beint og fá bæði lægra verð og sleppa við svona óheiðarlega viðskiptahætti, það er víst búið að hrekkja hinn almenna borgara nóg.

Gleraugnanotandi

Flatskjár - Ísland vs England

Var að skoða flott sjónvarpstæki hjá Heimilistækjum - Panasonic - TXP46G20ES - Fullt verð: 369.995 - Tilboð: 299.995.
Datt í hug að athuga hvar slíkt tæki væri ódýrast í UK. Fann samskonar tæki, nýtt að sjálfsögðu, á vefsíðu Amason. Það vekur athygli að "Tilboðsverð" hér heima er 100% hærra en verð með heimsendingu innan Bretlands.

Okurkubbur

Fór í Bókabúðina Eymundsson 19 Des og keypti dagatalskubb, stærri gerðina, sem kostaði 3.226 kr. Þetta kalla ég okur!
Jónína Gunnarsdóttir.

Okrað á lásaspreyi

Í gærkvöldi sárvantaði mig lásasprey, svona til að sprauta inn í frosinn lás. Ég fór á næstu bensínstöð og það vildi svo til að það var Olís. Fyrir pínulitla pakkningu var ég látinn borga 623 kr.!! Ef mig hefði ekki sárvantað þetta hefði ég hlaupið út með það sama! Það stendur ekki á pakkningunni hversu stór hún er en ég myndi giska á svona ca. 30 ml. Það þýðir að lítraverðið af þessu spreyi er á 20.767 kr.!!! Þetta er svipað lítraverð og á dýrasta koníakinu í Ríkinu. Ég ætla aldrei að stíga fæti inn í Olís aftur, það er ljóst.
Kveðja,
Guðmundur

Vatnsfiskur

Konan keypti fiskflök um daginn. Þetta voru ýsuflök með 10% íshúðun. Afhverju íshúðun er innifalin veit ég ekki en það ætti þá að vera hægt að fá fiskinn án íshúðunar eða íshúðunina sér, ekki satt?
En þar sem ég er stundum leiðinlega smámunasamur þá ákvað ég að vikta þetta allt sjálfur. Fiskuinn í umbúðum vó 838g en á umbúðunum var hann merktur 836g, límmiðinn gæti verið 2g með prentun, lími og fingraförum.
Ég hellti mestu af vatninu úr pokanum í skál og vó það sér, eftir að hafa tarað út þyngdina á skálinni að sjálfsögðu og þá var vatnið 202g.
Síðan vó ég fiskinn sér 634g í pokanum, með límmiðanum.
Eftir það ákvað ég að þerra fiskinn með húsbréfi og þá fór þyngdin niður í 594g úr upprunalegu 836g sem er ca: 41% ekki 10% eins og miðinn gefur til kynna. Þetta kalla ég vörusvik, það er ekkert annað heiti yfir þetta. Mér þætti gaman að sjá framan í þennan framleiðanda ef honum hefði bara verið greitt fyrir 60% af fisknum eða hann hefði fengið 60% af kvótanum.
Svona eiga menn ekki að gera.
Næst kaupi ég fiskinn en ekki frá þessum framleiðanda.
Kveðja,
Steinþór B. Grímsson

Óheiðarlegir viðskiptahættir í Toppskórinn Outlet

Í Fréttablaðinu í gær var heilsíðuauglýsing frá Toppskóm - Outlet sem hljóðaði upp á 50% afslátt af öllum vörum í búðinni. Ég var stödd í umræddri búð fyrir viku síðan og vissi nákvæmlega verð á Ecco inniskóm sem ég var að skoða. Um var að ræða tvennskonar pör sem kostuðu 11.995 kr. Þegar ég hugsaði mér að nýta mér þetta góða auglýsta tilboð í dag var búið að hækka alla skóna í 14.995 kr. Ég spurði stúlkuna hvernig stæði á þessu og hún tjáði mér að það gæti að það hefði ruglast eitthvað verðið og pör í kassa. Hún var s.s að gefa það til kynna að ég hlyti að hafa tekið vitlaust eftir. Hún fór fram og spurði einhverja konu og kom til baka og sagði að þetta væru rétt verð en það gæti verið að verð og pör hefðu ruglast. En þetta svar var svo loðið og tilbúið að ég var ekki tilbúin að kaupa það. Ég sagði að ég væri ekki ánægð með þessi vinnubrögð ef þetta væri rétt hjá mér og sagðist ekki ætla að láta hafa mig að fífli og gekk út og sagðist ekki versla hérMaðurinn minn var með mér og hann vissi einnig rétta verðið á skónum. Mér finnst rétt að fólk viti af þessu að þetta var svo sannarlega ekki um 50% lækkun á vörunum þar sem búið var að hækka vöruna um allt að 30% og "gefa" svo 50% afslátt. Fólk verður að vera á verði.
Kær kveðja,
Gunnhildur Grétarsdóttir

Hvað kostar jólaklipping barnanna?

Nú þurfa krakkarnir að komast í jólaklippinguna. Ég kynnti mér verð hjá 15 hársnyrtistofum fyrir þrjú systkini, 3 ára stelpu og 7 og 12 ára stráka. Stofurnar aldursskipta kúnnahópnum mjög misjafnt, sumar gera engan greinarmun á aldri barnanna, meðan aðrar skipta í marga aldursflokka. Eins og sést eru verðin mjög mismunandi – það munar 67.6% á lægsta og hæsta verðinu – og því greinilega ekkert samráð í bransanum. Auðvitað borgar sig því að athuga verðið áður en maður kaupir þjónustuna. Athugið að gæði og þjónustustig var ekki athugað í þessari könnun, bara verð. Athugið einnig að þessi könnun er ekki tæmandi, það er auðvitað fjöldi annarra stofa til en þessar fimmtán. Hér koma niðurstöðurnar, ódýrasta stofan fyrst og svo koll af kolli.

Í hár saman
Grettisgötu 9
6.800 kr
(1 x 1.800 kr / 2 x 2.500 kr)

Salon Nes
Austurströnd 1
7.000 kr
(2 x 1.900 kr / 1 x 3.200 kr)

Díva
Hverfisgötu 125
7.800 kr
(2 x 2.500 kr / 1 x 2.800 kr)

Solid hár
Laugavegi 176
8.000 kr
(1 x 2.000 / 2 x 3.000)

Englahár
Langarima 21
8.265 kr
(2 x 2.800 / 1 x 3.100 kr - 5% systkinaafsláttur)

Hárný
Nýbýlavegi 28
8.550 kr
(1 x 2.250 kr / 2 x 3.150 kr)

Brúskur
Höfðabakka 1
8.800 kr
(1 x 2.200 kr / 1 x 2.900 kr / 1 x 3.700 kr)

Manda
Hofsvallagötu 16
9.100 kr
(1 x 2.700 kr / 2 x 3.200)

Hárgreiðslustofa Helenu, Stubbalubbar
Barðastöðum 3
10.005 kr
(2 x 3.790 kr / 1 x 4.190 kr – 15% systkinaafsláttur)

Möggurnar í Mjódd
Álfabakka 12
10.450 kr
(1 x 3.150 kr / 2 x 3.650 kr)

Hárgreiðslustofan Gríma
Álfheimar 4
10.500 kr
(1 x 2.500 / 2 x 4.000)

Rakarastofa Ágústar og Garðars
Suðurlandsbraut 10
10.630 kr
(2 x 3.270 kr / 1 x 4.090 kr)

Korner
Bæjarlind 14-16, Kóp
10.700 kr
(1 x 3.100 kr / 2 x 3.800 kr)

Rakarastofan Klapparstíg
Klapparstíg 29
10.920 kr
(2 x 3.360 kr / 1 x 4.200 kr)

Ónix
Þverholti 5
11.400 kr
(3 x 3.800 kr)

Dr. Gunni
(Birtist í Fréttatímanum 10.12.10)

Ódýrasti jólakjóllinn og okrið hjá sumum!

Ég keypti mér jólakjólinn nú um síðustu helgi og langar að deila því með ykkur.

Ég byrjaði á því að fara á Laugaveginn af því þar er svo mikið af íslenskri hönnun. Eftir að hafa heimsótt nokkrar verslanir þar gat ég nú bara eiginlega ekki meira því mig var farið að svíða svo í augun undan verðmiðunum! Ég veit að maður á að reyna að styðja íslenskt en guð minn góður!! Einföld blússa á nærri fimmtíu þúsund kall! og kjólar sem kosta morð... get ekki ímyndað mér að það séu margir aðrir en útlendingar sem hafi efni á íslenskri tísku þessa dagana.

Ég ákvað því að kíkja í Kringluna og leita að einhverju sem veskið mitt þolir. Eftir að hafa heimsótt nokkrar búðir kíkti ég inn í nýja búð sem heitir Emami. og viti menn.. flottur jólakjóll á viðráðanlegu verði. Ég skoðaði einn silkikjól sem var á tilboði á 25 þúsundkall, það var hægt að breyta honum alveg endalaust. Ferlega sniðugt. Ég keypti hann samt ekki því ég fann annan sem ég féll alveg kylliflöt fyrir, rosalega flottur jólakjóll í svörtu silki og ég borgaði 26.900 kr fyrir hann (hann var ekki á tilboði). Það var líka hægt að breyta honum þannig að ég get verið í hinum á aðfangadag, breytt honum svo bara fyrir áramótin og notað hann svo enn og aftur í fermingunum án þess að nokkur fatti neitt! Þetta er sko jóladíll ársins.. að kaupa kjól sem hægt er að nota aftur og aftur.

En það sem kom mér mest á óvart að þegar ég var á kassanum þá sagði stelpan mér að Emami væri íslensk hönnun!! Hvernig geta þeir verið með eðlileg verð í búðinni sinni á meðan búðirnar sem ég heimsótti á Laugaveginum eru gjörsamlega í ruglinu með sín verð?!

Niðurstaðan: ódýrasti jólakjóllinn er sennilega í Emami búðinni í Kringlunni. Allavegana ef þú vilt kaupa íslenska hönnun.

Kveðja,
Guðrún

Hvað kosta persónulegu jólakortin?

Margir aðilar bjóða upp á þjónustu fyrir fólk sem vill sendir jólakort með mynd af sér og sínum nánustu. Algengasta leiðin er að fólk halar niður forriti sem það vinnur kortin í (stillir mynd eða myndir inn á, velur bakgrunn og kveðju), sendir útkomuna til prentfyrirtækisins og sækir svo kortin tilbúin skömmu síðar eða fær sent heim (sendingarkostnaður bætist þá við). Skoðum möguleikana og gefum okkur að framleiða eigi 30 kort. Öll verðin miðast við 30 kort og umslög eru innifalin í öllum verðum.

Oddi (www.oddi.is) framleiðir þrjár stærðir korta. Verðin: A5 (14.8 x 21 cm) – 5.370 kr, A6 (10.5 x 14.8 cm) - 4.770 kr og ferhyrnd 14 x 14 cm – 5.070 kr. Þetta eru allt opin kort með broti.

Hjá Póstinum (www.postur.is) er boðið upp á ílöng einföld kort í stærðinni 21 x 10 cm. Þrjátíu kort kosta 5.100 kr. Hjá Póstinum má líka panta frímerki með eigin mynd og er lágmarkspöntun ein örk, 24 stk. Verð á einni örk fyrir innanlands sendingu að 50 gr er 3.995 kr (166.50 kr/stk), en þess má geta að póstburðargjald fyrir innanlandsbréf að 50 gr er 75 kr.

Hjá Prentlausnum (www.prentlausnir.is) fást gerð kort í stærðinni A5 (5.070 kr) og A6 (4.170 kr). Hægt er að velja um opin brotin kort eða einföld kort, en verðið er það sama.

Samskipti (www.samskipti.is) bjóða upp á fjórar stærðir af jólakortum, með broti og án. Verð: A6 – 4.700 kr, A5 – 5.000 kr, 14 x 14 – 4.500 kr og 21 x 10 – 4.500 kr.

Pixel prentþjónustan (www.pixel.is) prentar þrjár stærðir. Verð: A6 – 6.300 kr, A5 – 6.900 kr og 15 x 15 – 6.900 kr. Öll kortin eru með broti. Fyrirtækið býður upp á 25% afslátt af öllum verðum til 10. desember.

Pixlar (www.pixlar.is) er með tvær stærðir, 10 x 21 og 15 x 15 – sama verð á báðum stærðum: 4.650 kr sé um einfalt kort að ræða, en 4.950 kr fyrir opin kort með broti.

Netfyrirtækið Jóla (www.jola.is) framleiðir kort af stærðinni 15 x 10 cm með broti. Þrjátíu stykki kosta 3.840 kr með umslögum sem þarf að panta sérstaklega.

Á kortavef Hans Petersen (www.kort.is) er hægt að velja um tvær stærðir, ílöng og ferköntuð einföld kort (21 x 10 og 15 x 15). Sama verð á báðum stærðum – 4.800 kr.

Myndval í Mjódd (www.myndval.is) er með þrjár stærðir. Þrjátíu stykki af stærðunum 15 x 15 og 10 x 21 kosta 4.560 kr., en 30 stykki af 10 x 15 kostar 4.050 kr.

Ljósmyndavörur (framkollun.ljosmyndavorur.is) bjóða upp á fjórar stærðir. Verð: 10 x 15: 3.900 kr, 10 x 20: 4.350 kr, 15 x 15: 4.350 kr og 15 x 20: 4.800 kr.

Eins og sjá má er nokkur verðsamkeppni á persónulega jólakortamarkaðinum. Verðin hér að ofan endurspegla þó á engan hátt gæði prentunar eða korta. Til að ná verðinu niður má svo fara þá leið að framkalla jólalegustu myndina (stafræn framköllun á þrjátíu myndum er á 1.110 kr. í stærðinni 10x15 bæði hjá Hans Petersen og Pixlar.) Þá mynd má líma í jólakort eða á karton (algent verð er 30 kr fyrir 180 gr A4 karton sem dugar í tvö A6 opin kort) og skreyta og föndra við með fjölskyldunni. Ekkert kort verður því nákvæmlega eins. Persónulegasta útfærslan getur því jafnframt verið sú ódýrasta.

Dr. Gunni
(Birtist í Fréttatímanum 2. des 2010)

Soda stream-hylki - mikil hækkun

Ég fór í Krónuna í dag, 3. desember og keypti mér nýtt kolsýruhylki í Sódastream tækið mitt. Ég fékk 594 krónur fyrir tóma hylkið og borgaði 3.354 krónur fyrir nýja kolsýruhylkið. Ég á ekki orð yfir álagningunni. Fyrir um það bil tveim mánuðum borgaði ég um það bil 1.800 krónur fyrir sama hylkið.
Kveðja,
Guðrún Sólveig Högnadóttir

Ótrúleg verðhækkun á kaffi

Mig langaði að segja þér frá ótrúlegri verðhækkun á kaffi á kaffihúsum Súfistans. Ég hef heyrt af umræðu um yfirvofandi hækkun á kaffi og að kaffihúsin myndu þurfa að hækka kaffi sitt verulega vegna hækkana á heimsmarkaðsverði og bjóst því við einhverjum hækkunum. Ég er vön að kaupa mér latte og taka hann með mér og borga fyrir það 380 kr (var um 300 kallinn lengi vel) á meðan hinir sem drukku á staðnum og notuðu sætin og borðin og bollana á kaffihúsinu borguðu 430 kr. Nú hefur verðið á sama lattebollanum hækkað í 480 kr og sama verð er á kaffinu hvort þú takir með þér eða drekkir á staðnum. Hækkunin er 26% á einu bretti. Ég er fastgestur á Súfistanum en mér finnst rosalegt að borga næstum 500 kall fyrir kaffibolla, svo því verður líklega kippt út núna.
Kaffikarlinn