N1 og bílavarahlutaverzlanir

Ég vil sýna fram á okrið sem viðgengst hjá N1 (Bíldshöfða, gamla Bílanaust). Nú stendur þetta fyrirtæki ansi tæpt og verðin eru löngu komin upp fyrir alla hófsemi í álagningu.

Fyrra verðdæmið er aðal-ljósaperur í bíl (t.d. H4, H7). Þessar perur voru i kringum 3500 kr. í Bilanaust (stk.), en um leið og við fórum í t.d. ET vörubila þá var möguleiki að fá perurnar á í kringum 800 kr. stk. (Báðar perur eru frá Osram, svo sama tegund hér).

Seinna verðdæmið er að ég keypti dempara i Mercedes Benz sem eg á, verðið sem ég fekk uppgefið hjá Bílanaust var 15 þús kr. stykkið, en svo skrapp ég í Bíla-Doktorinn (nýlegt verkstæði sem er að flytja inn varahluti og gera við Benza). Þar fékk ég þá báða saman á 17 þús. kr.
Semsagt næstum helmingi ódýrara.

kv. Hlynur Stefánsson

Ódýr ís í 10-11!!!

Langar bara að vekja athygli á einu. Fer stundum sérferð í 10/11 til að kaupa ís.
Ekki það að 10/11 sé ódýrasta búllan í bænum en þar er seldur ís frá Kjörís í
nokkrum bragðtegundum; bananasprengju, tromp, konfekt og piparmyntuís. Mig minnir að dollan sé á 290 kr til eða frá sem er nokkuð gott fyrir ís og það í 10/11. Það er ekki eins og þetta sé e-ð tilboð hjá þeim, þetta verð er búið að vera síðan allavega í sumar. Ég er sko með puttana á ísnum ;)
Var svo stödd í ísbúðinni Ís-landi um helgina og rak þar augun í nákvæmlega sama ísinn í dollu á 700 krónur. Ok, en mér finnst þetta alveg muna slatta, verð ég að segja, og mig munar alveg um aurana mína. Maður fær því 2 dollur á sama verði og ein í Ís-landi. Er þetta ekki aðeins of mikið?
Kv. Ís-Hildur :)

Ný fjáröflunarleið Símans

Ég er viðskiptavinur Símans. Ég er með heimasíma, internettengingu, GSM og sjónvarp Símans. Stuttu eftir að ég fékk sjónvarp símans datt myndlykill út. Ég fór eftir leiðbeiningum þeirra sem sett höfðu upp þjónustuna og kippti blessuðum lyklinum úr sambandi, beið í 30 sekúndur stakk í samband og fór eftir leiðbeiningum sem birtust á skjánum. Ekkert samband náðist og upp komu skilaboð um að hringja í þjónustuver Símans, sem ég og gerði. Þeirra ráðleggingar voru að taka úr sambandi, bíða í 30 sek og setja aftur í samband sem var og gert en virkaði ekki. Beðið var um mann á staðinn, en þar sem þetta var á laugardegi var ekki hægt að fá mann fyrr en eftir helgi. Seinna um kvöldið datt sjónvarpið inn aftur án þess að nokkur hefði reynt að laga það. Á mánudegi var hringt frá Símanum og spurt hvort ég vildi enn fá mann á staðinn. Ég afþakkaði, enda sjónvarpið farið að virka. Þessi prósess gerðist nokkrum sinnum, þ.e. að myndlykill datt út og ekki virkaði að endurræsa og því hringt í símann í kjölfarið. Í öll þau skipti var afþakkað að fá mann heim. Svo gerist það snemma í desember að hringt er í mig frá Símanum og mér tjáð að vegna tíðra kvartana frá mér hafi þeir fylgst með systeminu og það væri greinilega eitthvað að og hvort þeir mættu senda mann á staðinn til að líta á þetta. Auðvitað samþykkti ég enda var ekkert nefnt að þessi þjónusta væri í minn reikning. Maður mætti á staðinn og fiktaði í einhverri tengingu í vegg, sem var nýbúið að leggja af rafvirkja. Myndlykillinn batnaði ekkert við þessa "viðgerð". Amk eru allir heimilismenn orðnir vel sjóaðir í prósessnum. Það næsta sem ég veit er að það kemur reikningur frá Símanum fyrir þessa "þjónustu". Ég var ekki sátt og bað um útskýringar og sagði sögu mína en Síminn segir fullum fetum að ég hafi beðið um "þjónustuna" og því standi reikningurinn. Ég bað um að fá heyra upptöku símtalsins þar sem ég á að hafa beðið um þessa þjónustu og hef eftir það ekkert heyrt frá Símanum. Ég hef sent athugasemdir mínar 4 sinnum til þjónustuvers og tvisvar til upplýsingafulltrúa, sem er eina netfangið sem gefið er upp á heimasíðu Símans en fæ engin svör. Einu viðbrögðin sem ég hef fengið er að "skuldin" er komin í innheimtu hjá Momentum.
Best af öllu er síðan að reikningurinn er sendur á manninn minn, sem er alls ekki skráður viðskiptavinur Símans.
Mér finnst persónulega alveg svívirðilegt að hringja í viðskiptavin, tilkynna bilun og fá að koma og "laga" og senda svo reikning fyrir viðvikið.
Ragna

Karlakór Reykjavíkur rukkar fyrrverandi styrktarfélaga

Fyrir mörgum árum gerðist ég styrktaraðili Karlakórs Reykjavíkur og greiddi árlega í nokkur ár eftir það fyrir tvo miða á tónleika hjá þeim og naut þess árlega að hlusta á stórkostlegan söng þeirra.
Árið 2007 breyttust aðstæður og sagði ég þá þessari áskrift upp með tölvupósti og fékk ég staðfestingu um móttöku frá þeim.
Árið 2008 fékk ég senda miða ásamt tilkynningu um að andvirði miðana yrði dregnar af kreditkortinu mínu. Ég sendi þá aftur uppsögn og fékk staðfestingu um móttöku ásamt afsökunarbeiðni og að þetta myndi ekki endurtaka sig.
Stóð ég nú í þeirri meiningu að þetta væri allt frágengið en sú var ekki raunin.
Í síðustu viku fékk ég senda miða ásamt tilkynningu um að 4000 kr yrðu dregnar af kortinu. Í þriðja skiptið fór ég af stað og sagði upp áskriftinni og fékk um hæl afsökunarbeiðni og að þetta myndi ekki endurtaka sig.
Mér datt í hug að skoða færslur á kortið mitt aftur í tímann. Þar var færsla frá maí 2010 frá Karlakórnum að upphæð kr 4000 sem hafði einhvern veginn farið framhjá mér.
Þetta er því miður ekki eina tilfellið sem ég hef lent í varðandi aðild að styrktarfélögum, og þetta er ekki til þess að hvetja mig í að styðja þau í framtíðinni.
Nafnlaus

Er Krónan vísvitandi að reyna að blekkja neytendur?

Eftirfarandi mynd er úr blaði Krónunnar sem kom til mín í morgun (10.03.2011)
Ég bara spyr: Er krónan vísvitandi að reyna að blekkja neytendur?
(Skoðaðu myndina með því að smella á hana)
HHH

Afsláttur bensínfyrirtækjanna

Ég er að spá með þessa blessuðu dælulykla og afsláttarkort sem olíufélögin eru að bjóða. Nú er ég búinn að vera með bílpróf í 7 ár og bensínverðið hefur stökkbreyst á þessum 7 árum. Man eftir því í 90 kallinum minnir mig um það leiti sem ég fékk bílpróf.
Þannig þetta hefur hækkað alveg ógeðslega mikið. EN! Þessi afsláttarkort og dælulyklar sem olíufélögin eru að bjóða uppá eru náttúrlega bara einn brandari. Ég fékk þessar sömu 2 kr í afslátt fyrir 7 árum síðan þegar bensínverðið var um 90 kr á lítrann. Enn þann dag í dag þegar verð á líternum er búið að hækka um 140 kr síðan þá er ennþá verið að bjóða uppá 2 kr afslátt af lítranum. Hvað halda olíufélögin að við almenningur séum? Hvernig væri nú að olíufélögin myndu nú hækka þennan afslátt hlutfallslega jafn mikið og líterinn hefur hækkað?


Kveðja
GÁ

Er Gott kort gott kort?

Er með smávegis nöldur út af Góðu Korti. Gott Kort er vel auglýst á Kananum
FM 100,5 þá af Einari Ágústi. Ég ákvað að fá mér svona kort út af
tilboðunum. Ég fékk mér fyrirframgreitt kort. Ég legg inná það 5000 kall
og ætla að versla hlut sem kostar 3.990 krónur en sorry ekki heimild. Ég
hringi niður í Gott kort til að fá útskýringar. Þar stóð ekki á svörunum,
árgjaldið væri 7.900 krónur og væri dregið af fyrstu innborgun á kortið.
Einar Ágúst minnist hvergi á þetta, bara á tilboðin og sparnaðinn. Ég
sagði upp kortinu hið snarasta. Þetta þykir mér lélegt að minnast ekki á
árgjaldið í auglýsingunum. Hef einnig heyrt um fólk sem hefur ekki lagt
inn á þetta en hefur fengið svona kort og fengið reikning í netbankann
fyrir árgjaldinu.

Nafnlausi nöldrarinn

Tékkland ódýrast

Athyglisvert er að skoða verð á bifreiðaskoðun. Þetta er þjónustu sem er sambærileg alls staðar, þ.e. það er ekki "betri" skoðun á einum stað en öðrum.

Verð á venjulegum bíl (undir 3500 kg):

Aðalskoðun: 8.680 kr
Frumherji: 8.400 kr
Tékkland: 7.495 kr

Tékkland kom nýlega inn á markaðinn og er með þrjár stöðvar, Reykjavíkurvegi 54, Hafnarfirði; í Holtagörðum; og nýja stöðin er í Borgartúni 24.

Aðalskoðun og Frumherji hafa ekki lækkað sig við þessa ódýru samkeppni, amk ekki ennþá.

Dr. Gunni

Dýr áskrift - fær sér frekar gervihnattardisk

Það ætti að leggja þessa stofnun niður!

Stöð 2 - 7.235 kr
Stöð 2 Sport - 6.400 Kr
Stöð 2 Sport 2 - 6.295 Kr
HD Myndlykill - 1.200 Kr (Fast gjald á mánuði þó þú sért með áskrift)
Sport HD - 595 Kr (ótrúlegt að þetta skuli vera viðbótarverð þegar þú ert þegar að borga fyrir báðar sport rásirnar og aukaverð fyrir HD lykil!)
Samtals 21.725 fyrstu 4 mánuðina.

Stöð 2 - 7.235 kr
Stöð 2 Sport - 6.400 Kr
Stöð 2 Sport 2 - 6.295 Kr
Cam-kort - 4.000 Kr (start kostnaður)
Leigugjald - 500 kr (Fast gjald á mánuði þó þú sért með áskrift)
Sport HD - 595 Kr
Samtals 25.025

Ég held að ég noti þetta mánaðargjald frekar til að henda gervihnattardisk á svalirnar.
Kv, Magnús

Bestu bollu-kjörin?

Nú styttist í bolludaginn.
Ég fór í smá leiðangur áðan og fyrst var leiðinni heitið í Krónuna, en í nýja
bæklingnum þeirra auglýsa þeir 2 vatndeigsbollur á 319 krónur, sem er fínt
verð, hins vegar voru þær ekki til.
Þá fór ég í bakaríið Kornið sem er nánast hliðin á Krónunni í Hafnarfirði, þar
var mér ofboðið. Ein lítil og ræfilsleg vatnsdeigs bolla í Korninu kostaði 380
krónur!
Ég fór næst í Fjarðarbakarí í Hafnarfirði og þar kostaði ein vatnsdeigs bolla
320 krónur sem er nú skömmini skárra miðað við bakarí og sú bolla var líka
stærri.
P.s Ég hvet fólk til þess að koma með fleiri verðdæmi af bollum :)
Kv. Haraldur Arnarsson

100 kr. að fá sent email frá Arion Banka

Það kostar 100 kr. að fá senda kvittun um millifærslu rafrænt í emaili þegar maður millifærir hjá Arionbanka.
Það er okur.
Kvittun á pappír, send heim til manns kostar einnig 100 kr. Þetta er eini staðurinn sem ég hef átt viðskipti við þar sem kostar að fá kvittun.
-Kolbeinn Hugi

Ótrúlegt verð á skrifblokkum hérlendis

Ég fór um bæinn í leit minni að skrifblokk til þess að glósa í, á fundum, í vinnunni, í skólanum, almennar hugmyndir o.s.frv. Krafan var skrifblokk A5 að stærð, helst með bókamerki og teygju utanum til að geta haldið henni lokaðri.

- A4 Smáratorgi átti ekki mikið úrval, ekkert sem passaði almennilega við mínar kröfur. En það sem var í áttina að því var í lágum gæðum og ekki ódýrt eða yfirleitt á verðbilinu 2-4 þús. pr.stk.
- Office One í Smáralind áttu lítið af svona skrifblokkum, og engin passaði almennilega heldur þar. En þær voru aðeins skaplegri í verði á um 2-3þús. pr.stk. og einnig í aðeins betri gæðum.
- Eymundsson í Smáralind átti nokkrar og fann ég strax blokkina sem ég var að leita að. Heitir hún Moleskine og er í góðum gæðum, með vasa aftast til að geyma smá aukaefni, teygju og bókamerki. Allt var frábært, nema verðið. Hún kostaði tæplega 6 þús kr. Mér fannst það frekar dýrt, svo ég dró upp símann minn og notaði forrit til að skanna strikamerkið á bókinni og leita á vefsíðum að verðinu. Fyrsta sem kom upp var $11 fyrir bókina, og það bara í smásölu á netinu. Heldur mikill verðmunur svo ég fór bara heim...
Þegar ég kom heim, fór ég á netið og fann bókina á Amazon, pantaði 2stk þar með hraðsendingu hingað heim á 4400kr. Geri ég ráð fyrir því að þurfa að borga VSK af bókinni þegar hún kemur hingað, en ég fæ þá 2 bækur á svipuðu verði og stök bók er á hjá Eymundsson.
Nánar um bókina sem ég pantaði á Amazon ($9.64) - http://www.amazon.com/Moleskine-Ruled-Notebook-Large/dp/8883701127/ref=sr_1_1?ie=UTF8&qid=1298381935&sr=8-1
- 2stk með expedited shipment hingað heim kostuðu tæpa $38
- Á genginu 117 gerir það 4446 kr.

Lærdómur minn af þessu var sá að bera saman verð á vörum hérlendis og erlendis mun oftar með þessu forriti, því það borgar sig greinilega. En fyrir vörur sem maður hefur möguleika á að bíða aðeins eftir og fyrir svona mikinn sparnað bíð ég glaður í viku eftir að fá bækurnar.

Sigurður Bjarnason

Súperskór

Súperskór sf er í eigu ósköp venjulegs fjöslkyldufólks sem ákvað einn daginn að gera eitthvað annað og meira en að sitja heima í eldhúsi og kvarta undan verðlaginu á Íslandi. Fyrirtækið rekur netverslunina www.superskor.is þar sem boðið er upp á skófatnað á betri verðum en en boðið er upp á í verslunum á landinu. Síðan er skemmtilega upp sett og auðvelt er að panta vöruna þar sem bæði er hægt að greiða með kreditkorti og millifærslu á reikning verslunar. Boðið er upp á fría heimsendingu hvert á land sem er og fara skórnir í póst um leið og greiðsla berst til seljanda.
Í augnablikinu er aðallega boðið upp á skó fyrir börn og unglinga en stefnt er á aukaúrvalið jafnt og þétt og taka inn skó fyrir herra og dömur fljótlega. Ef farið er inn á síðuna sést að allir barna og unglingaskór kosta minna en 5000 kr.
Síðan hefur fengið góðar viðtökur og hafa þeir sem verslað hafa við Súperskó sf verið ánægðir með vöruna og þjónustuna. Margir halda kannski að ekki sé hægt að versla skó á netinu vegna mismunandi stærða og annara vandkvæða en það er ekki svo. Á síðunni má finna upplýsingar um þá skó sem þykja vera í smærri stærðum en gengur og gerist og einnig má þar finna tölur sem sýna innanmál í millimetrum. Ef skórnir passa ekki þegar þeir eru komnir til kaupanda er boðið upp á senda þá til baka og fá rétt númer sent í staðinn. Sendingarkostnaður vegna skipta á skóm fellur reyndar á kaupanda en engu að síður þægileg lausn.
Kristján

Ódýrt gos í Á stöðinni

Ég fer nú ekki oft í Hafnafjörðinn en það gerði ég um daginn, kom við í
sjoppu/bensínstöð sem heitir Á stöðinni og fékk þar hálfan líter af Egils
Kristal á 149kr. Var við öllu viðbúinn og bjóst við að þurfa borga um 300kr
eins og flestum sjoppum. Þeir eiga hrós skilið!
Þórunn

"Miðjan" úr lundinni dýrari í Nóatúni

Við hjónin fórum í Nótatún Hamraborg áðan til þess að kaupa okkur smávegis nautakjöt í matinn. Eftir smá umhugsun leist okkur best á ungnauta lund á kr. 5398 kílóið. Við þurftum ekki mikið, en það sem var til hjá þeim var c.a. 500 gr. Við báðum hann um c.a. 2-300 gr. af þessu hálfa kg. Þegar búið var að skipta lundinni þá reyndist bitinn sem við vildum vera um 300 gr. og ákvaðum við að kaupa hana. Þá tjáði starfsmaðurinn okkur að þar sem þetta væri miðjan úr lundinni, þá myndir kílóverðið HÆKKA upp í kr 5999 kílóið. Ég hef aldrei lent í svona vitleysu og hef til þessa geta gengið út frá því að það verð sem er auglýst í búðinni væri það verð sem neytandinn ætti að greiða. Það er með ólíkindum að þeir vogi sér að hækka verðið þegar maður er búinn að ákveða hvað kaupa á í það skiptið. Okkur fannst þetta hinn mesti dónaskapur og löbbuðum út úr búðinni. Er þetta það sem koma skal?
Kveðja,
Guðrún

Vændi í Fréttablaðinu

Við vinnufélagarnir vorum að skoða smáauglýsingar fréttablaðsins þegar mér var litið í nudd auglýsingarnar. Fyrir utan 2 auglýsingar frá Íslendingum mátti eingöngu finna auglýsingar á ensku. Ég tók mig því til og hringdi í símanúmerin sem fylgdu auglýsingunum til að forvitnast hvað fælist í whole body massage. Svörin sem ég fékk voru, allur líkaminn er nuddaður og svo er happy ending í lokin. Ef þú vilt meira þá kostar slíkt aukalega. Algengt verð fyrir svona þjónustu frá 10.000 kalli og uppúr. Er
þetta ekki vændi? Er semsagt hægt að versla svona í gegnum Fréttablaðið? Ja hérna. Svona er Ísland í dag.

ATH: Ég hafði aldrei í hyggju að nýta mér þjónustu þessara kvenna. Eingöngu var hringt til að spyrja hvað fælist raunverulega í þessari þjónustu.

Óskar nafnleyndar

Upplýsingar á afgreiðslukassaskjá

Væri ekki uppálagt að kanna hvernig staðið er að því að afgreiðslukassaskjár snúi að viðskiptavininum við kassann? Þ.e. að þeir sýni það verð sem sett er inn og svo samtöluna. Við sem erum heyrnarlaus og/eða heyrnarskert vorum að ræða þetta og þessu atriði er ábótavant í sumum verslunum. Mér finnst t.d. óþolandi þegar afgreiðslufólkið þylur upp upphæðina og maður segir HA? Snýr sér að skjánum og þar er samtalan ekki, heldur síðasta varan sem var slegin inn, þegar beðið er um upphæðina á skjáinn, kemur stundum fát á starffólkið, það fer að leita á lyklaborðinu að takkanum sem slá á svo samtalans sjáist á skjánum sem snýr að kúnnanum. Stundum finnst takkinn stundum ekki og stundum er sagt að takkinn sé bilaður o.s.frv. Þessu er mest ábótavant í Hagkaupum, á bensínstöðum, sjoppum; sem sagt í mörgum búðum. Í dag var enginn skjár til staðar í snyrtivörudeildinni í Hagkaup í Garðabæ, samt var þar að mér sýndist nýr afgreiðslukassi. Hvað segja lög og reglur um svona atriði? Ég er búin að senda fyrirspurn á Neytendastofu; postur@neytendastofa.is hef ekkert svar fengið en vona að þar finnst minnst einhver sem getur svarað þessu atriði. Þetta er upplýsingaraðgengismál og mér telst svo að fólk eigi rétt að sjá það verð sem slegið er inn og samtöluna líka. Eins mætti alveg skoða líka hjá gjaldkerum í banka með það í huga að viðskiptavinurinn á rétt á að sjá hvaða upplýsingar gjaldkerinn er að skoða um sig við afgreiðslu á sér og hvaða upplýsingar hann sér á skjánum þegar reikningsnúmer manns er slegið inn.
Kær kveðja,
Sigurlín Margrét

Ónýtar ljósaperur í Domti

Ég fór fyrir nokkru í verslun sem heitir Domti á Smáratorgi og rakst þar á ljósaperur af þeirri sortinni sem er orðin illfáanleg, þessar gömlu góðu, sem sagt, og þar sem þær voru á góðu verði, keypti ég nokkur stykki. Þær virðast hins vegar vera einnota, því ýmist sprungu þær um leið og kveikt var á ljósinu eða í síðasta lagi þegar næst var kveikt. Kippti mér svo sem ekki mjög upp við þetta, hélt jafnvel að eitthvað væri að rafmagni heima hjá mér, en nú hef ég af því spurnir að margir fleiri hafa lent í þessu. Er hægt að kvarta yfir ljósaperum? Má flytja inn hvað sem er?
Ég vildi vara fólk við að falla í þessa sömu gryfju.
Herdís Ólafsdóttir

Tilviljunarkennd verðlagning Icelandair

Ég er í fyrirtækjarekstri og ferðast töluvert. Ég er orðin nokkuð sleipur að finna mér hagstæðar flugferðir á netinu. En mér er óskiljanlegt hvernig Icelandair verðleggur sín flug. Endalausar auglýsingar á flugi "frá 18000 og eitthvað" sem er svo nánast vonlaust að finna þegar maður ætlar að bóka. Ég hef haft samband við félagið og það er alltaf sama svarið, búið að selja ódýrustu fargjöldin blablalba. En ég fullyrði að þetta er blekking. Hér um daginn skoðaði ég flug til nýs áfangastaðar Icelandair, Bilund. Ef þú ferð á bókunarvél Icelandair þá geturðu sannreynt eftirfarandi.

Dags út 27 júní og til baka 29 júní. Ég exa við báðar leiðir og niðurstaðan er kr 78.320

Svo prófa ég aðra aðferð:

Bóka aðra leiðina út 27 júní og hún kostar kr 18.880

Bóka aftur aðra leið Bilund Kef og upp kemur 19.409 kr. Samtals 38.289. Hér munar 40 þúsund krónum!

Eg prófa aftur út 28 júní út og til baka daginn eftir 29 júní = kr 99620

Aftur prófa ég hina aðferðina og niðurstaðan er 52,879. Hér munar 46 þúsund. Þetta eru sömu sæti í sama flugi.

Ég hef bókað flug hjá mörgum flugfélögum og ég fullyrði að verðlagningin hjá Icelandair er óskiljanleg og verulega tilviljunarkennd.

En það er vert að benda fólki á þetta, fólk getur sparað sér töluverðar upphæðir með að bóka eitt flug í einu. Það er að segja þangað til félagið uppgörtvar klúðrið.

Kveðja,
Níels

Neytendur hafðir að fíflum hjá Jóni og Óskari

Ég sé mig tilneydda til að senda meðfylgjandu upplýsingar varðandi óheiðarlega viðskiptahætti.
Um seinustu helgi, 7. - 9. febrúar, var auglýstur 40% afmælisafsláttur af öllum vörum hjá skartgripaversluninni Jóni og Óskari þar sem þeir áttu 40 ára afmæli. Þar sem ég hafði fengið dýra eyrnalokka frá þeim í jólagjöf og skipt þeim í inneignarnótu þann 15. Janúar 2011 þá hugsaði ég mér gott til glóðarinnar. Ég hringdi fyrst í verslunina og spurði hvort það mætti nota inneignarnótu á þessum afmælisafsláttardögum.
Svarið var ekkert mál. Ég var því voða ánægð þegar ég fór niður í búðina og ætlaði að versla fyrir nótuna mína sambærilega vöru á góðum afslætti. EN VITI MENN... vörurnar sem ég var búin að vera að skoða voru búnar að hækka á bilinu 34% til 36%.
Mér varð illt. Eyrnalokkarnir sem ég fékk í jólagjöf og skilaði 15. janúar kostuðu 34.200 krónur áður, en voru komnir í 47.000 krónur. Eyrnalokkarnir sem ég ætlaði hins vegar að skipta í voru á 37.200 þann 15. janúar en voru komnir í 50.000 krónur slétt.
Ég lét reyndar afgreiðslustúlkuna vita af þessu og hún hvíslaði að mér að ég fengi eyrnalokkana á gamla verðinu eða eins og þeir kostuðu vikuna áður. Viðskiptavinurinn sem stóð við hliðina á mér spurði hvort þetta væri svona með allt í búðinni en svarið var nei, einungis þetta tiltekna merki.
EN hvað vitum við?????????????
Tekið skal fram að í þessari verslun var fullt út úr dyrum alla helgina þar sem fólk hélt greinilega að það væri að fá 40% afslátt.
Virðingarfyllst,
Guðný Gísladóttir

Krónan skuldar mér 180 kr.

Þetta er ágætt í bland, Bónus og Krónan út á Granda. Krónan er þó aðeins meira eins og maður sé í búð, því Bónus er meira eins og maður sé í skemmu. Allavega: Í Krónunni hefur löngum verið ömurlega verðmerkt og það er ekkert að breytast. Auk þess er stundum vitlaust merkt. Auðvitað á maður að vekja athygli á þessu í búðinni og vera með uppsteit við kassann en það er bara svo ferlega bjánalegt og leiðinlegt fyrir aðra kúnna. Svona er maður slappur neytandi, þrátt fyrir allt. Áðan keypti ég erlent Famous lúxus hnetubland og tók alveg sérstaklega eftir því að pokinn kostar 399 kr. Kíkti ekki á miðann (eins og fífl) fyrr en ég kom heim og þá hefur þetta skannast inn sem Famous ristaðar hnetur á 579 kr – búðin hafði af mér 180 kr. Ég velti því fyrir mér hvort strikamerkin séu öfug á hinn veginn, þ.e. að maður borgi minna fyrir dýrari hneturnar? Ég ætti að bruna upp í búð með pokann og strimilinn en ég bara hreinlega nenni því ekki. (Frekar nenni ég að skrifa þetta á Okursíðuna!)
Í staðinn bíst ég við að Krónan hafi samband og leggi 180 kr inn hjá mér þegar ég hef gefið þeim upp reikningsnúmerið. Þeir geta sannreynt hvort ég sé ekki að segja satt á kassanum í Krónunni út á Granda.
Og eitt enn. Ég tróð vörunum í tvo poka og þeir rifnuðu báðir á leiðinni út í bíl. Munaði litlu að stórslys ætti sér stað. Aldrei hafa pokar, hvorki frá Bónus né Krónunni rifnað, sama hvað maður treður í þá, svo hér er klárlega verksmiðjugalli á ferð. Tékkið á því.
Bkv,
Dr. Gunni

Skítlegt viðmót Icelandair

Ég var að bóka mér flug til Evrópu og hugðist nýta mér 25.000 punkta sem ég hafði sankað að mér í gegnum árin. Þá fer ég inná þessa blessuðu Vildarklúbbsíðu þeirra, sem er ein sú ógagnsæjasta sem til er.
Ferðin kostaði 42.000 punkta og það var ekki hægt að setja punktana uppí ferðina.
Þannig að ég kaupi mér 17.000 punkta fyrir 25.500 krónur + 2.000 "millifærslugjald" og panta ferðina í góðri trú um að ég muni nú allavega koma út í hagnaði, þar sem að flugmiðinn kostaði 50.000 krónur.
Þegar ég er búinn að ganga frá pöntuninni fæ ég senda kvittun í pósti þar sem ég er rukkaður um 25.000 krónur, sem eru líklega skattar en hvergi tilgreindir sem slíkir og hvergi kom fram áður en að ég staðfesti pöntunina hversu háir þessir skattar yrðu.
Þannig að ég stend uppi með flugmiða sem er jafn dýr og venjulegur miði en 25.000 punktum fátækari. Þá hringi ég í Icelandair til þess að spyrja út í þessa hluti og þá fæ ég það allra skítlegasta viðmót sem ég hef fengið á allri minni æfi. Kona með hrokafullan tón tjáir mér að hún hefði sko aldrei keypt svona mikið af punktum og að það væri bara heimskulegt. Síðan segir hún að ég hefði vel geta gert mér grein fyrir þessu og svona væri þetta bara.
Nú langaði mig að breyta ferðinni og panta auka miða og hótel, og láta þessar greiðslur ganga uppí. Þá að sjálfsögðu er það ekki hægt, ekki einu sinni að skila þessum punktum sem ég í heimsku minni keypti.
Ég skora á Icelandair að auka gagnsæi í þessu pöntunaferli sínu og birta sundurliðað heildarverð áður en greitt er og leifa fólki að skila þessum blessuðu punktum ef að það hefur keypt þá, því annað er að ég best veit ólöglegt.
Pétur

Kókópuffs í 10-11 – minni kassi, sama verð

Er búin að kaupa Kókópuffs soldið mikið undanfarið. Fer alltaf í 10-11 í Engihjalla.
Kókópuffsið var búið svo ég fór útí búð og keypti annan pakka. Ég var ennþá með gamla kassann heima og þá sé ég að Kókópuffsið sem ég var að kaupa er minni kassi. Hann var eitthvað um 650 gr, en er núna orðinn 450 gr. En samt er SAMA VERÐ – 600 kall! Jamm... minnkaðu bara kassann en haltu verðinu – Gott trix!
Stefanía

Disney matreiðslubókin morandi í villum

Disney matreiðslubókin er uppseld, seldist í 14000 eintökum, ein mest selda bók landsins. Uppskriftirnar eru víst morandi í hvimleiðum villum. Sjá t.d.:

http://er.is/messageboard/messageboard.aspx?advid=22756543&advtype=52&showAdvid=22756543#m22756543

http://er.is/messageboard/messageboard.aspx?advid=21957173&advtype=52&showAdvid=21957173#m21957173

Kannski hefur það farið fram hjá mér en ég hef ekki séð þetta koma fram í fjölmiðlum. Skil vel að ekki sé vinnandi vegur að innkalla bókina en það ætti að gefa út nýjar leiðréttar blaðsíður svo fólk geti límt yfir ef það vill. Leiðinlegt ef eldri krakkar eru að elda eftir uppskriftum sem eru dæmdar til að mistakast og halda að þeir séu svona misheppnaðir sjálfir :-S )
Kv,
Bedda

Hrútspunga-okur

Ég var að versla í dag og rak augun í verð á súrmat og öllu þessu þorra-tengda dóti og fékk sjokk. Sá hrútspunga á 2990 kr/kg. Þarna er greinilega verið að fara yfir strikið. Þessi hefð deyr fljótt ef þetta heldur svona áfram. Þá fæ ég mér frekar hráskinku frá Ítalíu sem kostar sirka 1000 kr meira kílóið, en bragðast töluvert betur en súrsaðir pungar.
Einar