Strætó vondir við unglinga

Mig langar að benda á það óréttlæti gegn unglingum sem felst í gjaldskrá strætó. Stök fargjöld fyrir 11-18 ára eru 100 kr. Börn 6-11 geta keypt 20 miða á 750 kr. eða 38 kr. farið, unglingar 12-18 ára geta hins vegar keypt 16 miða á 1600 kr. eða 100 kr. farið, sem sagt enginn afsláttur við að kaupa miða þar. Fullorðnir greiða 280 fyrir staka ferð en 11 miðar fyrir þá eru á 2500 eða 227 kr. hver ferð. Ég skrifaði strætó í lok síðasta sumars og benti á þetta, en þeir hafa ekki séð ástæðu til að svara erindi mínu eða lagfæra hjá sér gjaldskránna.
Laufey

Ha, okur í 10/11...?!

Ekki veit ég hvort það taki því að tala um okur í 10/11 verslunum en um daginn var mér þó nóg boðið. Reyndar á þetta sér smá forsögu því í desember átti ég leið í 10/11 til að kaupa mér kveikjara, þeir höfðu þangað til verið á verðbilinu 80 - 150kr en þetta kvöld var mér seldur kveikjari á 279 krónur. Mér fannst það heldur dýrt en hló þó að þessu og ákvað að ekki skyldi ég kaupa aftur kveikjara hjá þeim. Svo lenti ég í því um daginn að ég gleymdi kveikjaranum mínum og sárvantaði eld. Ég var rétt hjá 10/11 verslun en minnugur kveikjaraokursins þá ákvað ég að gerast hagssýnn og kaupa mér eldspítustokk. Þangað til fyrir um ári kostaði einn svona stokkur 10 kall en þá hækkaði hann á flestum stöðum upp í 15 krónur. En mig rak í rogastans þegar ég kíkti á strimilinn, eldspítustokkurinn kostaði 69 krónur. Það má líkja þessu við að ef mjólkurlítrinn hafi kostað 100 kall fyrir ári þá kostaði hann 690 krónur í dag eða að hægt væri að tala jafnlengi í gsm frelsi fyrir 6900 krónur í dag og fyrir 1000 krónur fyrir ári. Ef verslanir hegðuðu sér almennt svona og hækkuðu allar vörur um þessa prósentu, þá væri nú gaman að lifa, maður myndi sleppa við að fara í búðina og éta gras.
Friðrik Atlason

Skuldfærslugjald hækkar um nær 200% á 6 mánuðum

Einhver talaði um skuldfærslugjald upp á 120 kr. ! Á hálfu ári hefur skuldfærslugjald hjá Kreditkort hf. (MasterCard) hækkað um 193% úr 135kr. í 396 kr. Nú þarf maður að kanna hvort það er ódýrara að borga reikninginn sjálfur heldur en að leyfa þeim að gera þetta sjálfvirkt. Nú, eða segja upp kortinu því þetta kallast SJÁLFTAKA !!
Zor Gubb

Vsk-lausudagarnir í Hagkaupum

Fór í Hagkaup í gær (Sunnudaginn 29.3.2009) með unga frænku mína, tilgangurinn
var að kaupa gúmmístígvél á dömuna. Hagkaup hafði auglýst "Vsk daga" á
skófatnað, sem þýðir að það hefði átt að vera 20% afsláttur af öllum
skófatnaði.
Það hefur lengi gengið sú flökkusaga að þeir hækki verðin fyrir Vsk daga og
trúði ég því svona rétt tæplega. Nú er ég hinsvegar sannfærð og hér er ég með
mynd því til sönnunar.
Stígvélin voru verðmerkt á 2490.- og borgaði ég 1999.- fyrir þau með afslætti.
Mjög illa hafði verið límt fyrir gamla verðmiðann svo það sást greinilega í
gegn að það hafði verið límt yfir gamla verðið. Og hvað kostuðu þau fyrir
hækkun?
Jú einmitt! 1999.- Vávává hvað ég græddi á þessu frábæra tilboði!
Helv.. bófar!
Valgerður G.
(P.s tók ekkert eftir þessu fyrr en heim var komið enda er athyglin svolítið
annarsstaðar en á verðmiðanum þegar maður verslar með 2 ára gömul börn :))
_______________________________

Rakaskemmdir

mig langar að minnast á þjónustuna hjá Símanum. Ég fór með síma sonarins í viðgerð, en hann var enn í viðgerð. Um viku síðar er hringt og sagt að það séu rakaskemmdir í símanum og að það svari ekki kostnaði að gera við hann. Ég kannaðist ekki við að neitt hefði komið fyrir símann sem hefði getað orsakað rakaskemmdir en starfsmaðurinn vildi meina að það væri nóg að vera með símann inni á baðherbergi þegar farið væri í sturtu til þess að slíkar skemmdir yrðu. Mér var sagt að viðgerðarmaðurinn hefði tekið myndir af skemmdunum og ég gæti fengið að sjá þær. Þegar ég fór í Símann Smáralind til að sækja símann og fá að sjá þessar myndir var mér sagt að ég gæti ekki fengið símann nema greiða skoðunargjald og samt var síminn í ábyrgð (og er enn), myndirnar fékk ég aftur á móti í tölvupósti. Ég get reyndar ekki sagt til um hvort það eru rakaskemmdir sem þar sjást eða hvort þessar myndir eru af síma sonar míns eða einhverjum öðrum síma. Þarna finnst mér freklega brotið á rétti neitenda, í fyrsta lagi með því að skýla sér á bakvið rakaskemmdir til þess að komast hjá því að gera við síma sem enn er í ábyrgð og hins vegar að neita að láta mig hafa hann í hendur nema borga þeim fyrir. Til hvers er þessi ábyrgð þá?
Laufey Ósk Þórðardóttir

Gamlar dýnur sem nýjar

Verð að deila með ykkur góðu sparnaðarráði.
Þannig er að dýnurnar okkar, sem eru um 10 ára gamlar, voru farnar að gefa sig ( eðlilega).
Þetta eru dýnur frá Ragnari Björnssyni, Hafnarfirði, svo ég fór inná heimasíðu þeirra til að kynna mér verð á nýjum dýnum.
Þar rak ég augun í það að RB rúm er eina þjónustufyrirtækið á sínu sviði sem býður endurhönnun á springdýnum eftir áralanga notkun.
Ég hringdi til að panta tíma fyrir dýnurnar mína, ...mætti síðan með þrjár dýnur kl. 8:00 að morgni og náði í þær aftur sama dag rétt fyrir lokun.
Þá var búið að stífa þær allar upp og skipta um áklæði á tveimur þeirra, … voru því eins og nýjar.
Það kostar 8.900,- að stífa upp hverja dýnu og nýtt áklæði kostaði sama, eða 8.900,-
Ég var farin að sjá fyrir mér mikil útgjöld í nýjum dýnum, þar sem góður nætursvefn og hvíld skiptir jú miklu máli.
Vildi því benda á þessa þjónustu hjá Ragnari Björnssyni, ef það hefur ekki verið gert áður.
kveðja,
Ágústa

Heiðarleg steypustöð

Ég þurfti að kaupa steypu í nóvember og fékk tilboð frá þremur steypustöðvun. Steypustöðin Borg var með lægsta tilboðið þannig að ég tók því og greiddi uppsett verð daginn áður en þeir komu og steyptu. Nú deginum eftir steypunina hringja þeir frá Borg og biðja mig um reikningsnúmer vegna þess að þeir þurfi að endurgreiða mér þar sem ég notaði ekki allt íblöndunarefnis sem ég hafði greitt fyrir.
Málið er að ég hefði ekki vitað af því ef þeir hefðu ekki hringt og endurgreidd mér. Að mínu mati heiðaleg þjónusta.
kveðja Sigríður

Besti díllinn á raksápu

Ég má til með að benda á besta dílinn í bænum í raksápu. Xtra raksápa í
Nettó kostar 199kr fyrir 300ml. Jafnstór af ódýrustu Gillette týpu kostar í
Europris 400-500kr.
-haffi

Afslátturinn í Bónus

Hér meðfylgjandi eru myndir sem ég tók að umbúðum af kjöti keyptu
í Bónus. En þannig var að við keyptum einn pakka og nokkrum dögum
síðar þegar við ætluðum að elda þetta þá fannst okkur þetta ekki
vega nóg. Þannig að við keyptum aðeins meira.
Þú sérð nú fljótlega hvað slær mann hér en um daginn var alveg
sérstakur afsláttur 50% !!! en síðar var 10% afsláttur en nú var varan
ódyrari !
Kv, Oddur

Títuberjasultan í Ikea ódýr

Fór í Hagkaup um daginn og keypti 400g af Títuberjasultu, hún kostar
þar c.a. 650kr.
Seinna sama dag fór ég í IKEA því þeir voru að auglýsa kjötbollur á
tilboði, þá rakst ég þar á 400g af Títuberjasultu á 260kr.
Held ég fari að kíkja oftar í þessa IKEA matvörubúð, því þar er
ýmislegt hægt að fá á hlægilegu verði.
Þórarinn Þórarinsson

Okur á rúðuþurrkublaði

Þeir hjá N1 okursjoppunni eru nú ekki í vandræðum með að verðleggja hlutina eins og meðfylgjandi mynd sýnir.
Eitt stykki rúðuþurrkublað kostar 2.690 krónur takk fyrir!
Maður er meira eða minna tilneyddur að kaupa þetta því að óbeina samráðið er svo mikið og samkeppnin nákvæmlega engin,eins og allir vita.
Kristján Blöndal

Slappir í Tölvuvirkni

Fyrir einu og hálfu ári síðan keypti ég tölvu í Tölvuvirkni sem ég hef átt í nokkrum vandræðum með frá fyrsta degi. Ég hef farið með tölvuna 2x til þeirra en sama vandamálið er enn til staðar. Tölvan er enn í ábyrgð en þar sem að hún er vinnutækið mitt þá má ég ekki missa hana nema í stutta stund í senn. Því ákvað ég að hringja í Tölvuvirkni í vikunni að leita upplýsinga til tæknimanna, í þeirri von að þeir gætu gefið mér upplýsingar um hvernig ég ætti að straujað tölvuna. Mér var tjáð að þær upplýsingar sem ég leitaðist eftir yrðu aðeins uppgefnar, gegn þóknun, ef ég kæmi á staðinn með tölvuna. Löglegt en siðlaust? Og til að toppa þjónustuna, þá skellti starfsmaðurinn á mig þegar ég lýsti undrun minni á því að rukkað yrði fyrir slíkar upplýsingar (enda tölvan í ábyrgð).
Sigríður

Metal og Guðmundur Arason góðir

Mig langar að nefna góða þjónustu sem ég fékk nú á dögunum. Mig vantaði lagnahluti úr ryðfríu stáli og eftir að hinir ýmsu seljendur höfðu sent mig bæinn þveran og endilangan hafnaði ég hjá fyrirtækinu Metal í Suðurhrauni, Gb. Þar á bæ var mér tekið tveim höndum, leyst úr öllu því sem mig vanhagaði um og þegar ég nefndi afslátt var það auðsótt mál, auk þess sem þeir hlutir sem ég keypti voru á sanngjörnu verði. Ég var ánægður með þessi viðskipti og lét vita af því þegar ég kvaddi.
Í leiðinni vil ég nefna fyrirtækið Guðmund Arason ehf., í Skútuvogi, sem selur smíðajárn ofl. Ég hef átt viðskipti við það fyrirtæki til margra ára, þó í smáum stíl sé og hef aldrei mætt þar öðru en góðu. Þar virðast allir viðskiptavinir, stórir sem smáir vera lagðir að jöfnu með fyrirtaks afgreiðslu og þjónustulipurð.
Gunnar Th.Þ

Skuldfærslugjald

Sælar hagsýnu húsmæður.
Ég var að sjá greiðsluseðil frá Mastercard.
Þar er skuldfærslugjald upp á 120 kr.
Það er hægt að gefa þessu ýmis nöfn t.d. seðilgjald en það er bannað.
Af hverju má í dag kalla það skuldfærslugjald?
Hagsýnn húsbóndi

Nefskattur Rúv

Ég var að gera skattaskýrsluna og þá brá mér. Við erum 4 í heimili sem borgum skatta. Við þurfum hvert okkar að greiða 17.100 kr í gjald fyrir útvarpið.
Þetta gerir í heildina 68.400 kr.
Ég var áður að greiðs fyrir heimilið ca. 2.900 kr á mánuði sem gerir 34.800 kr á ári.
Þetta gerir 96,55% hækkun á heimilið okkar. Ef þetta er ekki okur þá veit ég ekki hvað er hægt að kalla þetta.
Sonur minn er í námi í Svíþjóð og ég vona að hann sé ekki líka að greiða þetta afnotagjald.
Börnin mín sem eru rukkuð fyrir þetta án þess að spyrja þau, þau hlusta aldrei á útvarpið hjá Rúv.
Þau horfa nánast ekkert á sjónvarpið og ef þau gera það þá er það á tækið sem er í stofu heimilisins. Semsagt tæki sem öll fjölskylda á. Við erum ekki með sjónvarpstæki í öllum herbergjum. Kannski fara þau gjöld sem þau greiða í að greiða af bílnum hans Páls. Það á ekki að bitna á mínum börnum þó Páll fái bíl til afnota.
Hvernig dettur mönnum í hug að hækka álögur á dæmigerða fjölskyldu svona og það á þessum slæmu tímum. Eru menn ekki með öllum mjalla?
Hagýnn húsbóndi

Blu-ray spilarar í Sony center

Ég fór í Sony Center í Kringlunni í gær til að spyrjast fyrir um Blu-Ray (High definition DVD) spilara. Sá spilari (týpa BDP-S550) sem ég hafði mestan augastað á var ekki til hjá þeim en afgreiðslumaðurinn sagði að það væri mögleiki að panta hann inn. Ég spurði hvað hann mundi koma til með að kosta og þá var svarið: 149.900 kr. Á heimasíðu Sony Centers (www.sonycenter.is) eru engar verð- eða vöruupplýsingar en í staðinn er maður fluttur yfir á alþjóðlega Sony síðu, www.sony.co.uk. Þar eru upplýsingar um spilarann og verð skráð: 319 pund. Á núverandi gengi (28.03.09) svarar það til ca. 54.550 kr. Það væri fróðlegt að vita hvernig þessar viðbótar nærri 100.000 kr. sem Sony Center leggur á spilarann eru tilkomnar??? Ítreka einnig að þetta verð, 319 pund, er fengið á síðu sem þeir sjálfir vísa á!
Kv. Axel Ólafur Smith

Hjartaheill söfnunin

Mig langaði bara að senda þér línu eftir að ég hringdi styrktarsímtal til hjartaheillar í kvöld. Símsvarinn sagði þá: Bíddu í 4 sekúndur eftir að hljóðmerkið heyrist og þá verður gjaldfært 3000 kr á símreikninginn þinn AUK 79 kr. ÞJÓNUSTUGJALDS til Símans.
Hvað er í gangi? Söfnun í gangi og auðvitað sér Síminn það sem auðgunartækifæri
Ég var svolítið fúl þegar ég heyrði að ég hefði verið að gefa 79 kr til Símans. Eins og þeir séu ekki að okra nógu mikið á manni nú þegar..
Lilja G

Við eigum lífeyrissjóðina

Ég hvet alla til að skrifa undir þetta:

http://okkarsjodir.is/

Jónbjörg

Myglað á Ruby Tuesday

Verð bara að segja frá ferð minni á Ruby Tuesday í skipholti í dag. Ég og kærastinn minn fórum út að borða á Ruby Tuesday. Ég pantaði mér Fajitas með kjúklingi. Þegar maturinn kom á borðið leit þetta mjög vel út. Fajitas kökurnar voru rúllaðiar inn í smjörpappír. Þegar ég rúllaði út kökunum kom í ljós að þær voru myglaðar! myglaðar! oj barasta. Við kölluðum á þjóninn sem kom nú eftir svolítin tíma. Ég sýndi honum kökurnar og sagði honum að þetta væri myglað! "já, ég kem með nýjar" sagði hann mjög snaggaralega eins og ekkert væri eðlilegra, kom með nýjar kökur og sagði eitt lítið "afsakið" og fór í burtu. Ég var hálf hneyksluð yfir því hvað honum fannst þetta lítið mál. Hinar kökurnar voru reyndar ekki myglaðar og ég borðaði hluta af matnum. Þegar við vorum að fara bjóst ég nú við að við myndum nú vera beðin almenninlega afsökunnar og amk fá afslátt (finnst reyndar að ég ætti ekki að þurfa að borga fyrir matinn). En nei, við borguðum yfir sjö þúsund krónur og engin frekari afsökunarbeiðni. Ég var bara orðlaus og sagði ekki neitt, sé eftir því núna.
Manni finnst að maður ætti að geta treyst því að geta fengið nokkurn vegin fengið ferskan og óskemmdan mat á veitingastöðum.Ég fer allavegana ekki aftur á Ruby Tuesday.
Bjarnheiður

Krónan í Mosó er klósett vikunnar á atlisteinn.is

Krónan í Mosó er klósett vikunnar á atlisteinn.is. Sjá hér.

Ekki versla í Babysam!

Ég keypti kerrupoka hjá Baby Sam fyrir ári síðan. Var úti í frosti með pokann fyrir norðan um daginn og þá kom fram olía meðfram saumunum á pokanum. Pokinn er ljós á litinn þannig að þessir blettir eru MJÖG áberandi og svo er náttúrulega olíulykt af honum. Ég hafði samband við þá og sagði afgreiðslukonan að þetta væri olía úr saumavélinni og bauðst til að gefa mér smá afslátt og sögðu svo að þetta myndi fara í þvotti. Ég vildi nú frekar fá nýjan en sagði hún að þeir ættu þessa tegund ekki lengur til og þeir sem væru til væru ekki eins góðir og þessi. Þannig að ég auðvitað þvoði pokann og olíublettirnir versnuðu við það!!!!
Ég hafði aftur samband við verslunarstjóra Baby Sam og hann bauð mér að skila pokanum og fá endurgreitt. Ég sagði að það gagnaðist mér ekki neitt því í einhverju þyrfti barnið að sofa og vildi fá annan sambærilegan poka í staðinn (svona pokar náttúrulega búnir að margfaldast í verði síðan ég keypti hann). Verslunarstjórinn þvertók fyrir það þar sem hann sagðist bara vera með mun dýrari poka til sölu en þennan sem ég keypti (eðlilega þar sem pokinn var keyptur fyrir bankahrunið og myndi þessi sami poki vera mun dýrari í dag). Þannig að ég sit uppi með gallaða vöru sem ég fæ ekki bætt þar sem ég ætla ekki að fara að punga út haug af peningum til að fá annan kerrupoka fyrir barnið mitt. Þetta kallar maður sannarlega að gera vel við kúnnann eða hitt þó heldur!!!! Vildi að ég hefði vitað fyrr hversu þjónustulundað fyrirtæki Baby Sam er því þá væri ég ekki búin að versla við á vel yfir annað hundrað þúsund síðan guttinn fæddist fyrir ári síðan!!!
Ég hef heyrt að öllum líki rosa vel að versla við BabySam þangað til að þeir lendi í veseni eins og að þurfa að skila gallaðri vöru. Ég var að tala við Neytendasamtökin og það eiga allir rétt á að fá vöruna viðgerða eða nýja sambærilega vöru, þá er verið að tala um sambærilega í gæðum ekki verði. En það er rosalega erfitt að segja hvað er sambærilegt og sanna það. Afgreiðslukonan í BabySam sagði að minn kerrupoki væri mun betri en þeir pokar sem þeir eru með í sölu núna en verslunarstjórinn segir öfugt!!!! Og ef ekki er til neitt sambærilegt (sem mjög erfitt er að meta) þá á maður rétt á endurgreiðslu........ Konan sem ég talaði við hjá Neytendasamtökunum fannst þetta vera MJÖG lélegt hjá BabySam!!
Kv. ein ósátt við mjög lélega þjónustu......

Skástu verðin í Elko

Ég og unnusta mín höfum verið að þræða raftækjaverslanir hérna á landinu til þess að finna bestu "fermingartilboðin" í hverri verslun fyrir sig og ákváðum að gefa ungum frænda okkar 32" flatskjársjónvarp svo hann hætti að einoka stofuna undir ps2 tölvuna sína.
Það sem okkur finnst ótrúlegast er að eini staðurinn sem ekki er beint með fermingartilboð (þ.e.a.s) Elko, eru samt 10-35% ódýrari heldur en allar aðrar verslanir sem selja sjónvarpstæki á landinu. Það sem okkur finnst líka skrýtið er það hatur sem virðist vera frá öðrum búðum á þessa einu alvöru lágvöruverslun í raftækjum á Íslandi. Fórum í eina ónefnda búð miðsvæðis í reykjavík að skoða sjónvarpstæki frá Philips. Allt lofaði mjög góðu, tækið hafði átt að kosta 189 þúsund krónur, en var á frábæru tilboði á 150 þúsund. Starfsmaður í umræddri verslun sagði okkur eftir að við spurðum hann hvort aðrir væru að selja þetta tæki, að Elko hefði verið að selja þetta, en ættu aldrei neinar vörur til sökum þess að þeir væru að fara á hausinn, starfsfólk þar væri ókurteist, og þeir gætu aldrei boðið okkur sambærilegt tæki á sama verði. Þar sem ég kannast nú við strák í Elko í skeifunni ákvað ég að kíkka þangað, og mér til undrunar var þar sama tæki, ekki á neinu tilboði og á því verði sem það hafði alltaf verið á, á tæpar 135 þúsund kr.
Skiljanlegt í dag þar sem samkeppnin er mikil við að halda lífi í svona búðum að það sé einhver kuldi á milli samkeppnisaðila, en lygi og rógburður er nú yfirleitt ekki góð forsenda fyrir því að beina viðskiptum til sinnar búðar.
Óðinn

FireWire snúra

Mig vantaði FireWire snúru og ákvað því að gera smá verðkönnun.
Ég byrjaði á heimasíðu Elko þar sem ég bý rétt hjá þeim.
Snúran góða kostar þar frá 1.995-3.495 en hjá Computer.is (Tæknibær) kostar sambærileg snúra 900 kr.
Elko er náttúrulega með verðvernd og lofar því að endurgreiða muninn og 10% í viðbót þannig að á endanum ætti snúran að vera ódýrari í Elko, spurning hversu margir nýta sér þessa verðvernd.
Kv.
Nökkvi S

Langar að benda á móðgun á KFC

Málið er að við fórum þangað og keyptum fyrir yfir 3000 kallinn mat
og svo spyr stúlkan okkur hvort við viljum krydd með frönskunum ?
(keyptum stærsta franskarskammtinn)..
Já auðvitað segjum við,,þá segir stelpan:já það kostar!!! ha!!!
Kostar kryddið?????
Ofan á 3000 kallinn að fara að borga fyrir kryddið sem þú lætur á
franskarnar er bara algjört bull.
Við hættum við og spurðum ekki einu sinni hvað kryddið kostaði, þótt
þær hafi kostað 5 kall þá er þetta bara móðgun!!
kv,
Greifinn

Ostsneið í Björnsbakaríi

Fór í björnsbakarí,
bað um eina bollu með graskersfræum
skera hana og bæta við ostsneið
bollan kostar 90 krónur
þegar viðbótargjörningi var lokið, ostsneiðin komin á, þá kostaði þetta allt samtals 280 krónur.
ég spurði hvort þetta gæti staðist
já, það er vegna þess að það er vinna á bakvið þetta allt saman!
tók ca 2o sek
einmitt,
kær kv
gunni