Europris okur

Ég fór síðastliðinn laugardag með börnin í trampólin leiðangur en komst að því að þau voru allsstaðar uppseld nema í Europris þar sem verðið var langhæst í bænum. Þar sem börnin voru búin að safna sér sjálf fyrir trampólíninu var ákveðið að kaupa það samt þessu dýra verði áður en sumarið væri á enda og borga fyrir þau það sem uppá vantaði.
Trampólín með neti kostaði þennan dag í Europris tæpar 60.000 krónur en hafði verið á rúmlega 40.000 í öðrum verslunum. Ég spurði starfsmann hvort engir afslætti væru í gangi eða hvort útsala væri á næsta leiti en var sagt að svo væri ekki, þeir gætu bara ekki lækkað vegna óhagstæðs gengis.
Í gær (miðvikudag 22.7.09) fjórum dögum seinna datt svo inn um lúguna hjá mér blað frá Europris þar sem á forsíðunni eru auglýst trampólín af sömu stærð og það sem börnin keyptu, með neti, á tæpar 44.000 kr. Ég hringdi á skrifstofu verslunarinnar og sagði mína sögu en var sagt að það væri ekkert hægt að gera fyrir mig og líkti starfsmaðurinn þessu við kjúklingabringur í Bónus sem fara á tilboð með engum fyrirvara. Ég á ekki til orð yfir þessa þjónustu þar sem ég spurði sérstaklega út í afslætti og tilboðsblaðið hefur sennilega verið farið í prentun þegar við keyptum dýra trampólínið!! Ég ætla ekki að stíga fæti inn í þessa verslun framar. Ég vildi bara koma þessu á framfæri þar sem þetta er ekki í fyrsta skipti sem ég heyri um lélega þjónustu í Europris.
Guðrún Guðmundsdóttir

Okur á Skógum

Ég kom við á versluninni í Fossbúð á Skógum undir Eyjafjöllum í gær,
skammt frá Skógarfossi. Keypti helstu nauðsynjar og í matinn. Um er
að ræða litla verslun við hliðina á matsölustað þar sem aðallega
útlendingar versla. Verðið á vörum í búðinni er með þvílíkum eindæmum
að það tekur ekki nokkru tali. T.d. kostaði pakki af 20 servíettum
500 kr. Almennt sýndist mér verð á vörum í verluninni vera langt
langt yfir verði annars staðar á landinu.
Með baráttukveðju
Jón Ársæll Þórðarson

Verð á afþreyingu

Er að bugast á verðum fyrir hóp í einhverskonar skemmtiferð.
Ég er búinn að vera að leita að hópferð fyrir 14 manns , annaðhvort fjórhjólaferð, vélsleðaferð o.s.frv.
T.d. fékk ég tilboð fyrir 14 manns í fjórhjólaferð við Bolöldu í 4 tíma (hjá Litlu kaffistofunni) grillaðir borgarar og 2 öl á mann eftir ferðina, samtals 5 tíma prógram.

Þetta kostar 593.600 kr.!!!

Allur þessi iðnaður er sniðinn fyrir útlendinga, verð í evrum o.s.frv. Það er að verða ógerlegt fyrir íslenskan hóp að gera e-h svona, sérstaklega miðað við árferði.

Endar þetta ekki bara að svona lúxus verði bara fyrir ferðamenn, hvernig væri að fara að taka Castro sér til fyrirmyndar og hafa verð fyrir heimamenn og verð fyrir ferðamenn?

Þetta er Okur Okur Okur!!!
Kv . Auðunn

P.s. Ég lét 8 manns giska á heildarpakkann í þessu tilboði og sá sem skaut hæst giskaði á 250.000 kr , flestir í kringum 100.000 - 130.000 og sjálfur átti ég von á um 200.000kr tilboði . Það er eitthvað athugavert við þetta.

Ótrúlega snubbótt svar World Class

Yfirleitt vil ég ekki kvarta en ég er eiginlega svo hneykslaður - kannski meira yfir svörum en vinnubrögðum - að ég verð að deila reynslunni.
World Class sendi fyrir síðustu jól meðlimum sínum gjafakort fyrir stökum prufumánuði. Meðlimir gátu síðan gefið vinum og vandamönnum kortið. Tilgangurinn væntanlega að leyfa fólki sem ekki eru í viðskiptum að prófa aðstöðuna.
Þessa "gjöf" fékk ég frá mínum betri helmingi og ætlaði að bregða mér í prufumánuð nú í sumar. Hins vegar virðist gjafakortið hafa glatast í flutningum og því sendi ég póst á skrifstofu World Class með upplýsingum um konuna - kennitölu o.fl. - og óskaði eftir nýju korti. Þau gætu vonandi séð að gjafakortið hafi ekki verið nýtt.
Svarið sem ég fékk var eins snubbótt verið gat:

Sæll Benedikt
Því miður þurfum við að fá þetta í hendurnar, þetta er hvergi skráð. Þetta er bara glataður peningur.
KV. Árný

Svarið er kapítuli út af fyrir sig og dæmir sig sjálft. Aldrei myndi ég í það minnsta ráða í framlínu manneskju sem svarar viðskiptavinum á þennan hátt. En að fyrirtæki standi í markaðssetningu (þessi "jólagjöf" er ekkert annað en bein markaðssetning) en hafi síðan ekki innra kerfi fyrir utanumhald finnst mér fyrir neðan allar hellur.
Ákvörðunin er því einföld; árskortið keypt á öðrum stað.
Kær kveðja,
Benedikt Bjarnason

Enn hækkar í Bláa lóninu

Það er víst farið að kosta 4000kr fyrir fullorðna í Bláa Lónið og 1200kr fyrir unglinga á aldrinum 14-15 ára. Er ekki bara málið að hætta að fara í lónið þangað til þeir lækka þetta?
Kv. LKR

Punktablús

Ég vildi láta vita af því sem mér finnst vera algert okur hjá Flugleiðum og Flugfélagi íslands og í raun með ólíkindum að þetta sé liðið af neytendastofu og samkeppnisyfirvöldum.
Þannig er mál með vexti að ég ætla til Ísafjarðar um þarnæstu helgi og þar sem akstur þangað er nokkuð langur þá athugaði ég með flug þessa helgi og vildi nota vildarpunkta sem ég og konan eigum inni til að greiða fyrir flugið eða í það minnsta hluta af því.
Til að byrja með þá er EKKI hægt að bóka ferð með vildarpunktum á netinu og strax við það þá byrjar flugfélagið og flugleiðir að svindla á fólki og taka við slíka bókun 600 kr gjald fyrir þjónustuna (sem ég myndi ekki nota ef það væri hægt að gera þetta öðruvísi).
Ofan á þetta leggst svo flugvallaskattur og fleira og er kostnaður við að borga með vildarpunktum því kominn í 1800 krónur á mann eða samtals 3600 ca fyrir þessa ferð til Ísafjarðar.
Svo er mér tjáð að ofan á þetta þá sé tekinn 2000 krónu gjald fyrir að NOTA vildarpunktana, þannig að kostnaður við þetta er orðinn 5600 krónur auk 20.000 vildarpunkta.
Ofan á allt annað er mér svo tjáð að þetta verði að vera greitt af sama vildarpunktahafa, þ.e ég þarf sem sé að standa í því að millifæra punkta af mér yfir á konuna mína eða öfugt til að það séu 20.000 punktar til ráðstöfunar þar. Já ok gott og vel en ofan á það þá er mér tjáð að ég þurfi að BORGA 3000 krónur fyrir að millifæra þessi helvítis punkta á milli okkar!!!
Þannig að ég þarf að borga 8600 krónur OG 20.000 vildarpunkta fyrir þessa gríðarlegur kjarabót sem flugleiðir rænir fólk með.
Með tilliti til þess að flugið vestur kostar um 9600 á mann aðra leið ÁN vildarpunkta (netfargjald sem er ekki það ódýrasta) þá þykir mér þetta orðið algjört rán og OKUR og ef þess væri einhver kostur þá ætti fólk að sniðganga flugleiði og ÖLL tengd fyrirtæki eins og það getur.
Ég hef aldrei vitað annað eins rugl og þetta og að þeir VOGI sér að kynna þetta sem bónuskerfi þegar svo þeir nota það til að kroppa endalaust pening af fólki þannig að þegar upp er staðið kostar ferðin nánast það sama og áður en punktar eru notaðir og það án alls þess vesens sem fylgir því að bóka þetta SVOKALLAÐA vildarsæti.
Kveðja,
Jóhann Árni Helgason

Sambíóin - Ekki 500 á þriðjudögum á 3D

Sambíóin - Allar myndir á 500 á þriðjudögum

Þar síðasta þriðjudag fórum við tvö með 9 ára strák á Ice Age 3D í Sambíóin Álfabakka. Við borguðum 3700 fyrir herlegheitin. Hvergi er tekið fram í þessum auglýsingum að það eigi ekki við um 3D myndir (mér finnst svo sem kannski alveg sanngjarnt að það væri aðeins dýrara á þá myndir, t.d 750 (sem er þá 250 kr dýrara eins og munurinn er á milli venjulegra mynda og 3D mynda). Einnig er nú aldrei tekið fram heldur að þetta eigi ekki við um Lúxussal en maður getur svo sem sagt sér það sjálfur og það er tekið fram inn á síðu Sambíóanna.

Af síðu Sambíóanna:
500. kr í bíó á þriðjudögum
SAMBÍÓIN HYGGJAST GERA ÞRIÐJUDAGA AÐ BÍÓDÖGUM Þ.E. ALLIR MIÐAR Á 500 Kr.
SAMBÍÓIN muna á næstu vikum bjóða þjóðinni að mæta alla þriðjudaga í kvikmyndahús sín; Álfabakka, Kringlunni, Akureyri, Selfoss og Keflavík þar sem miðaverð verður einungis 500 kr. á ALLAR[1] kvikmyndir og má því halda því fram að hvergi í heiminum sé hægt að fá lægra bíómiðaverð!

Ástæða þessa fyrirkomulags er sú að SAMBÍÓIN hafa leitast eftir skilningi við sína erlendu birgja í kjölfar íslensks efnahagsástands með það að leiðarljósi að gleðja Íslendinga í erfiðu árfeðri.

SAMBÍÓIN vilja jafnframt skora á önnur fyrirtæki að gera slíkt hið sama; þ.e. að vinna samhent að því að létta undir með íslenskum almenningi og reyna hvað þau geta til forðast verðhækkanir þrátt fyrir erlend útgjöld.

[1] Gildir ekki í Lúxus/VIP sal

Óska nafnleyndar

Vaxtaokur Kreditkorta

Góðan daginn,
mig langaði að vekja athygli á okurvöxtum sem eru á veltukortum útgefnum af Kreditkortum hf.
Á meðan kaupþing er með 15.6% vexti á sínum (gull)veltukortum og hafa lækkað verulega síðan stýrivextir fóru að lækka, virðist kreditkort hf hafa ákveðið að hirða mismuninn sjálfir og bjóða almúganum uppá 20% vexti. Þeir vextir voru endurskoðaðir og lækkaðir úr 22.5% hjá þeim 15.júní og stendur ekki til að lækka þá meira. Þess má einnig geta að dráttarvextir hjá þeim eru lægri en þeir venjulegu eða 19% (enda ákveðnir af seðlabankanum). Og einsog það væri ekki nóg þá rukka þeir sérstaklega fyrir það ef maður hringir í þjónustuverið og biður um stöðu korts, eða spyrja útí færslu þá ertu rukkaður fyrir 105 krónur á kortið þitt og greiðir símtalið líka. Þannig vextirnir standa greinilega ekki undir þeim kostnaði, líklegast fara þeir allir í vasann eða uppí útrásarskuldir, hver veit? Langaði bara vara fólk við þessu. Því munurinn á vöxtum á 500þ króna skuld hjá kaupþingi og kredidkortum hf er 22.500 krónur á ári. Mér finnst ótrúlegt að fyrirtæki skuli gera þetta við vaxtapínda þjóð. Ég óskaði eftir lægri vöxtum og spurði þá hvort þetta væri nokkuð prentvilla á síðunni þeirra, svarið sem ég fékk var: "þeir eru svo sannarlega 20% og það er ekki í boði að lækka vexti fyrir bara einn einstakling." - Þannig kannski lækka þeir ef nógu margir kvarta, eða að næg athygli á málinu sé vakin?

Heimildir:
http://kreditkort.is/einstaklingar/gjaldskra/vextir/
http://kreditkort.is/einstaklingar/gjaldskra/nr/163
http://www.kaupthing.is/?pageid=292

kv. Nafnlaus.

Batterí

Hér kemur eitt dæmi um okur, ja alla vega stórkostlegan verðmun.
Ég fór nýlega á Shell-stöðina við Gylfaflöt þar sem starfar mjög elskulegt og þjónustulundað fólk.
Ég spurði um 1.5V batterý. Ég gat þar fengið tvö saman (Duracell minnir mig örugglega) á tæpar 1.500 kr. Mér fannst það heldur mikið svo ég hætti við.
Í dag þurfti ég að fara í Örninn, reiðhjólaverslun, og spurði þá m.a. um svona 1.5V batterý. Þar gat ég líka fengið tvö í pakka frá Duracell á 299 kr.
Sem sagt - ekki versla svona batterý hjá Shell nema þið viljið borga 5-falt verð fyrir þau - verslið þau heldur í Erninum.
Kveðja, Herdís

Varahlutir

Var að hringja út og kanna með verð á afturhjólalegu (með pakkdósum) í gamlan Subaru Legacy (1997).
AB varahlutir virðast vera ódýrastir. Þar fæst settið hjá á 12.988,- Til viðbótar bjóða þeir 12% afslátt ef maður er með dælulykil frá Atlandsolíu. Verðið fer þá niður í 11.429,-
N1 voru næst ódýrastir með legusettið á 14.990,-
Stilling kom næst með 15.568,-
Fálkinn kom næstur með 17.101,-
Og að sjálfsögðu var umboðið með rugl verð, kr. 22.900,- eða næstum því 100% dýrara en þar sem varan er ódýrust.
Ég kaupi alveg að “orginal” hlutur sé eitthvað dýrari, en að verðmunurinn sé svona mikill er auðvitað rugl.
Kv.
Snorri, Hvanneyri

Nýr veitingastaður

Gleðifregnir fyrir sveltandi fólk í kreppunni ! kynntist af slysni nýjum veitingastað (hann opnar bráðlega en hefur opnað fyrir útpantanir), Áfangastaðurinn Borgartúni 14 (www.food4me.net) og prófaði að panta mat af þeim, sem var bara ótrúlega góður! ég varð södd og þurfti ekki að borga meira en 1000 kall fyrir :D
Tinna Dögg

Flugmiðaverð aðra leiðina hjá Iceldanair !!

Þannig vill til að ég er að fara flytja erlendis og þarf því aðeins að
kaupa flugmiða aðra leiðina. Tengiflug mitt er í gegnum London Heathrow
þannig að Icelandair er eina valið. Þeir bjóða uppá að kaupa miða aðra leið
en það er svimandi upphæð. Miði aðra leið kostar 69.400 kr en ef ég bóka
báðar leiðir kostar miðin á sama flug aðeins 23.950. Mikið þætti mér gaman
að vita hvernig Icelandair rökstyður þennan verðmismun. Ég athugaði einnig
hvernig Iceland Express hagar sínum málum með miðakaup aðra leið og þeir
eru á réttu róli. Miði aðra leið kostar sama og ef maður mundi bóka báðar
leiðir.
Takk fyrir,
Rúnar Ingi Ásgeirsson

Talhólf

Það skiptir væntanlega ekki máli hjá hvaða símafyrirtæki fólk er. Öll taka þau þátt í gríðarlegri gjaldtöku sem heitir Talhólf.
Það kostar 21. Kr. hjá Símanum að fá skilaboðin „Þú hefur náð sambandi við talhólf...“. Venjulega skellir fólk á án þess að nýta sér þjónustuna.

Dæmi um eins ár notkun á þessari þjónustu miðað við að lenda í 1 Talhólfi á dag:
21x1 = 21 kr. á dag
147 kr. á viku
588 kr. á mánuði
7.056 kr. á ári

Dæmi um eins ár notkun á þessari þjónustu miðað við að lenda í 5 Talhólfum á dag:
21x5 = 105 kr. á dag
735 kr. á viku
2.940 kr. á mánuði
35.280 kr. á ári

Það er samfélagsleg skylda allra að slökkva á talhólfinu og láta eins marga og kostur er gera slíkt hið sama.

Arnar

Jói Fel bakari

Ég fór um daginn í bakaríið jóa Fel í smáralindinni og ætlaði að fá mér samloku þar og þegar ég var búin að biðja um það spyr afgr. Stúlkan mig hvort ég ætli að taka matinn með eða borða hann hjá þeim og svara ég henni að ég ætli að borða inni hjá þeim, þá segir hún mér að það kosti aukalega, hætti ég snarlega við þetta, nógu dýrt fannst mér það sem ég sá hjá þeim í borðinu.
En að rukka aukalega fyrir að fá að setjast inn til þeirra að snæða matinn þeirra finnst mér OKUR!!!
Kv. Smári

Rándýr Íspinni

Ég var að koma frá Shell-stöðinni í Ártúnsbrekkunni og ætlaði að kaupa mér ís í góða veðrinu. Valdi mér e-n nýjan Daim ís sem að ég hef ekki séð áður. Þegar ég ætlaði að fara að borga fyrir hann sá ég að hann átti að kosta 798kr. Mér fannst það full mikið fyrir 1 íspinna þannig að ég skilaði honum snögglega.
kv.
Kristinn

Smurstöðvarkönnun

Ég kannaði með verð á 3 smurstöðvum vegna fólksbíls sem ég er með, svo
til hefðbundinn 10 ára gömul Toyota Corolla eftir að hafa lesið
athugasemdir varðandi smurningarkostnað hér á síðunni. Hjá Max1
kostaði smurningin um 10 þúsund, hjá Bílaáttunni á Smiðjuvegi um 8-9
þúsund og hjá smurstöðinni við Suðurlandsbraut
(Næturvaktarbensínstöðinni) kostaði hún nákvæmlega 8600. Er þetta
miðað við þessa "hefðbundnu" smurningu, þ.e. vélaolíu og síur. Þessi
símtöl kostuðu mig svo kannski 50 krónur en ég sé að þarna getur maður
sparað amk 1000-2000 krónur, á að tékka á verðinu og velja réttan
staðinn.
Gummi

Verð á spurningaspilum

Ég get bara ekki orða bundist. Ég og mín fjölskylda vorum á leiðinni upp í sumarbústað og hafa það náðugt. Við komum við í bókabúð (Eymundsson) til að kaupa spil til að hafa með okkur. Mín elsta var spennt fyrir "Trivial Pursuit - stelpur á móti strákum" og ég ætlaði að láta það eftir henni en rak í rogastans þegar ég sá verðið. 6995 krónur, takk fyrir, fyrir 100 spurningaspjöld (sem eru þá líklega 600 spurningar) og tvo teninga. Í sömu hillu var annað spurningaspil, Spurt að leikslokum. Það kostaði 3990 krónur og er með nýjum spurningum og þær eru 1620 samtals. Við keyptum það og vorum flest mjög ánægð með það. Ef hægt er að selja svona svipað spil á þessu verði, hvernig getur þá staðið á því að Stelpur á móti strákum er svona miklu dýrara?
kv.
Sigrún

Ósáttur við 2001

Ég vil koma á framfæri tilkynningu um mál er varðar slæma og vonda afgreiðslu og þjónustu sem að ég fékk hjá einni verslun hér í Rvk. Verslunin sem að ég vil nafngreina hér, heitir 2001 og er staðsett á Hverfisgötu 49. Eigandinn að þessari búð heitir Sigurður.
Verslun þessi selur Bío-myndir og tónlist á DVD formi. Þegar að ég kom inn í búðina og spurðist fyrir um eina mynd sem að ég átti í pöntun hjá Sigurði og sýndi honum greiðslu mína til hans þá var svarið að hún væri ekki komin til landsins. Ég sagði þá að ég myndi ekki greiða hærri upphæð en þá sem að um var talað í upphafi pöntunarinnar sem voru rúml, 1700.kr
Hann brást illa við þessu, fór fram í verslun og benti mér á ýmis verð sem að eru á myndum í rekkum verslunarinnar. Í sömu andrá sagði hann að hann skyldi endurgreiða mér þá upphæð sem að ég hafði borgað inn á viðkomandi mynd og gerði það, reif síðan niður pöntunina og sagði mér að koma mér strax út úr búðinni og koma aldrei inn í hana aftur.
Ég sagði þá að ég myndi ekki sætta mig við svona framkomu og slíkan verslunar-máta og tilkynnti honum að ég myndi leita réttar míns í þessu leiðinda-máli. Hann sagði þá að honum væri nákvæmlega sama, hvað ég myndi gera í málinu. Ég leitaði þá til Neytenda-samtakanna, síðan til Neytenda-stofu og endaði svo daginn síðast til Skattrannsóknar-stjóra að Borgartúni 7.
Ástæða óánægju minnar yfir framkomu hans er sú, að ég hef verslað við þessa búð hátt í 3 ár með mikið magn af myndum en hef ekki fengið kvittun fyrir borgun á öllum þeim fjölda mynda, nema tveim síðustu sem að ég keypti hjá honum fyrir rúmlega tíu dögum síðan. Ég bað hann vinsamlegast um kvittun eða kvittanir fyrir öllum fyrrum keyptum myndum hjá versluninni, en þá sagði hann að hann gæti ekki og myndi ekki láta mig fá kvittun fyrir. Ég hef marg oft orðið vitni að því, að sjá það að þegar að ýmsir viðskipta-vinir verslunarinnar hafa keypt myndir hjá 2001 þá hefur hann ekki afhent
kvittanir til baka. Eg er búinn að versla vel yfir 150 myndir þarna í þessari búð og sá tími nær tæplega þremur árum. Þegar að ég hef verslað myndir í öðrum búðum eins og Elko, B.T, Hagkaup og Nexus þá er mér ávallt afhentar kvittanir fyrir greiddri vöru. Ég hef allar þessar kvittanir hjá mér fyrir kaupum frá þessum verslunum. En hef aðeins tvær kvittanir til staðar frá versluninni 2001. Ég er engan veginn sáttur við svona lagað.
Minn réttur er sá að fá kvittun afhenda fyrir vörunum. Ég taldi það vera siðferðisleg skylda mín, að láta Skattrannsóknara-embættið vita af því að verslunin gæfi ekki kvittanir til baka, fór með þetta mál til þeirra og sýndi þeim hluta af þeim kvittunum sem að ég var með frá öðrum búðum og svo þessar tvær frá versluninni 2001. Verðmunurinn á þeim myndum sem að keyptar eru hjá 2001 og hinum verslununum er gríðarlegur í raun. Þó að pantaðar séu eldri og jafnvel gamlar myndir hjá 2001 miðað við jafn-gamlar myndir annars staðar, þá er verðmunurinn að jafnaði helmingi meiri.
Ég get ekki sætt mig við svona okur-starfsemi og sendi þetta bréf öðrum til varnaðar.
Jón Grétar

Pælingar varðandi gæði matvæla

Flott vinna sem er í gangi varðandi verð matvæla og fleiri vara þó betur megi ef duga skal. Annað atriði sem við Íslendingar eigum talsvert í land með. Hvenær er vara vara. Tökum dæmi af appelsínu. Okkur er kennt ungum að aldri að appelsína sé holl. Samt er það svo að appelsínan sem við fáum í næstu verslun getur verið orðin allnokkuð öldruð og á kannski ekki skilið heiðursheitið (holl) appelsína. Ástæðan, jú hún inniheldur ekki lengur það magn af vítamínum sem hún innihélt þegar hún var falleg og fögur týnd af trénu. Hún gæti t.d. verið því sem næst C vitamin laus. Er hægt að kalla slíka vöru appelsínu og er eitthvert eftirlit með því hér á landi hvenær appelsína má heita appelsína en ekki gamalt stöff af akrinum. Ávextir og grænmeti eru framsett sem holl vara. Litlar upplýsingar eru um upprunaland, hvenær hún var framleidd , hversu fersk hún er og hvernig hún var flutt etc..
Önnur spurning. Er eitthvert eftirlit með að það sem á að heita lífræn vara sé lífrænt í botn og grunn.
Kveðja,
Guðbrandur

Röfl við Kaupþing

Meðfylgjandi er bréf sem ég sendi til míns viðskiptabanka, Kaupþings rétt í þessu:

Ég hef verið með mín viðskipti hjá ykkur í yfir 4 ár, lengst af hef ég verið með fyrirframgreitt kreditkort er nefnist "kortið". Allan þann tíma hef ég á u.þ.b. tveggja mánaða fresti fengið í merktum pósti auglýsingableðil þar sem þið reynið að selja mér vöru sem ég hef nú þegar keypt. Ég hef leitt þetta hjá mér hingað til og kastað miðunum beint í ruslið en nú er komið nóg.
Til hvers eruð þið að þessu? Er þessi miði hugsaður sem tilkynning með nýjustu tilboðunum til að halda korthöfum við efnið? Af hverju eru lokaorðin þá "Sæktu um á www.kortid.is"? Eða eruð þið í blindni að senda svona merktan póst á alla í einhverjum ákveðnum markhópi sem ég fell óheppilega inn í? Er yfirhöfuð réttlætanlegt að banki sendi viðskiptavinum ruslpóst í merktum umslögum? Mun ég ekki enda á að henda umslagi sem hefur að geyma mikilvægar upplýsingar?
Ekki nóg með að þið séuð markvisst að eyða verðmætum tíma mínum og að láta höggva niður dýrmæta skóga fyrir þessar tilgangslausu og ómarkvissu auglýsingar, heldur gerið þið þetta allt á kostnað almennings, því íslenska þjóðin er jú að reka þennan banka eftir að þið tókuð þátt í að setja hana á hausinn. Ég held við höfum þarfari hluti að eyða pening í en þetta.
Hér með krefst ég þess að hætt verði að senda mér þessa tilgangslausu auglýsingapésa í merktum pósti. Fái ég aftur svona bréf mun ég segja upp mínum bankaviðskiptum hjá ykkur og þar með "kortinu" sem þið virðist reyna allt til að pranga inn á fólk.
Virðingarfyllst, Þorsteinn Valdimarsson

Vonbrigði á Balthazar

Ég var með gesti erlendis frá í nokkra daga sem fóru í dag. Þau langaði að
snæða íslenskt lamb síðasta kvöldið og ég fór á netið og skoðaði nokkra
matseðla og valdi veitingastaðinn Balthazar í Hafnarstræti 1-3 þar sem þar
var hægt að fá grillað lambakjöt á 2690 kr sjá matseðil
hér: http://balthazar.is/Balthazar/Menu_-_Kveld.html
Þegar á staðinn kom komst ég að því að lambakjötið sem ég hafði valið
staðinn vegna kostaði 3200 og laxinn sem ég hafði ákveðið að fá mér var á
2600 en ekki 2300 eins og kemur fram á netinu. Einnig var laxinn búinn og
bleikja í boði í staðinn. Ég pantaði að auki súpu dagsins.
Þetta var nú ekki það eina. Þjónustan var svo ömurleg að ég átti ekki til
orð. Hvar finna menn svona starfsfólk? Stúlkunni á barnum fannst ekkert að
því að vera með gamlan matseðil á netinu, það voru bara mín mistök að trúa
heimasíðunni.
Við vorum 5 saman. Við sátum í um 30 mínútur áður en þjónn virti okkur
viðlits og það var eftir að við höfðum veifað eins og fávitar til að ná
athygli hans (tek fram að staðurinn var alls ekki þétt setinn (þriðjudagur
um kl. 8). Nú var pöntunin tekin. 30 mínútur liðu þar til ég missti
þolinmæðina og fór á snyrtinguna og spurði í leiðinni hvað matnum liði.
Þjónninn sagði strax jú hann er að koma. Á klósettinu blasti við
hryllingur. Annað klósettið var með hurð sem spörkuð hafði verið upp og
ekki hægt að loka. Hitt klósettið lak og vatn var úti um allt gólf. Enginn
klósett pappír var og engin sápa.
Ég kom aftur að borðinu. Verið var að bera matinn í okkur en við fengum
ekki öll matinn á sama tíma. Einn í hópunum fékk kaldar franskar kartöflur
með hamborgaranum sínum. Við bentum þjóninum á þetta og viti menn, hann
tók eina frönskuna af diskinum og sagði já það er rétt. Einn í hópnum
þurfti þrisvar sinnum að biðja um gaffal. og svo var það súpan, ég spurði
þegar bleikja mín kom í kaldhæðni hvort súpan væri borin fram fyrir eða
eftir aðalréttinn. Þjónninn var með svarið á reiðum höndum: alveg sama þú
ræður. Almáttugur. Það var fokið í mig svo ég hreytti út úr mér ég vil fá
hana á fyrir. Við sem pöntuðum súpu fengum hana þá borðið, hún var köld,
og það var alls ekki pláss fyrir svona marga diska á borðinu. Einn pantaði
hvalkjöt, það var allt of mikið steikt. Ein pantaði pastarétt sem var
óætur.
Hvað er eiginlega að því að að færa gestum hnífapör og forrétti á UNDAN
aðalréttinum?
Þetta endaði svo á því að stúlkukindin sem tók við greiðslu var alveg
vanhæf og gat ekki reiknað út hvað við áttum að fá til baka. Sá sem
greiddi rétti henni meira fé en um var beðið og hún sagði að það vantaði
upp á.
Þessi staður er vonbrigði og allt og dýr miðað við skort á gæðum og
þjónustu. Okurverð á subbulegri búllu. Hálf stjarna því bleikjan var ágæt.
En það er nú líka mjög erfitt að klúðra bleikju.
Edda Björk Ármannsdóttir.

Kreppugler

Rakst á þessa síðu og langaði að benda á hana http://kreppugler.is/
Kannski er búið að segja frá henni hérna inni áður.
Brynjar

Dýr íspinni

Fékk vægt sjokk um sl helgi en var staddur að skoða Gullfoss og Geysi
eins og hver annar túristi á Íslandi í dag.
Ekki nema að heitt var í veðri og kærkomið að skella sér á íspinna hjá
Geysir Shops í Haukadal.
Viti menn 4 pinnar fyrir okkur kostuðu 990 ISK! Fokk, hvað er að
gerast!? Síðan er auglýstur íspinni í helgarblaði DV frá Kjörís á 99
ISK (Diskópinni) en þarna var hann verðlagður á 270 ISK.
Læt fylgja með ljósmynd af vöruplakati frá Kjörís sem hékk þarna uppi
til skýringar! Hvað kostar eiginlega að flytja vörur frá Hveragerði og
uppá Geysi?
Með ískaldri kveðju,
Matthías

Dýr súkkulaðikökusneið - er þetta eðlilegt?

Ég tel mig nú vera með þokkalegt langlundargeð en sl. laugardag þá blöskraði mér. Þannig var að ég ásamt manninum mínum og barnabarni tylltum okkur niður í sumarblíðunni á kaffihúsið Espresso barinn á Lækjartorgi. Keypti ég kaffi og djús og súkkulaðikökusneið handa barnabarninu og kostaði þessi kökusneið kr. 790,- og var hún frekar í minni kantinum. Ég áttaði mig ekki á verðinu fyrr en ég var búin að borga hvað sneiðin kostaði. Það sem svo gerði endanlega útslagið að mér finnst hafa verið okrað á mér er það að á sunnudeginum átti ég leið í Sandholt bakarí á Laugaveginum og þar sá ég nákvæmlega eins súkkulaðiköku og spurði hvað sneiðin hjá þeim kostaði og er hún seld á kr. 520,-. Ég gat ekki orða bundist við afgreiðslumanninnn í bakarínu og sagði frá hvað sneiðin hefði kostað á Espresso barnum. Afgreiðslumaðurinn sagði mér að þeir keyptu súkkulaðikökuna hjá þeim. Ég bara hreinlega skil ekki þessa verðlagninu það er greinilega dýr ferðakostnaðurinn frá Sandholt bakarí á Laugaveginum og niður á Lækjartorg.
Mig langar reyndar að bæta við hversu jákvætt mér finnst að hafa litla grasblettinn á Lækjartorgi, þessi blettur glæðir torgið lífi.
Með sumarkveðju,
Sigrún Elfa

Dýrasta kaffið á landinu?

Var stödd í Skaftafelli fyrir viku, og komst að því að ég gleymdi kaffinu mínu heima, sem er nátturulega það fyrsta sem ég fæ mér á morgnana. Svo við hjón fengum okkur bíltúr í Freysnes og viti menn: Kaffið var til og tvær tegundir, Merrild kostadi rúmar 1200 kr og Gevalía rúmar 1600 kr! Þar sem ég var alveg kaffilaus keyptum við ódýrari pakkann, eða þannig. Þetta er ekki há verðlagning - þetta er OKUR! Ég hef mjög gaman af því að ferðast um landið en það er orðið spurning hvort ég hafi efni á því. Kv,Guðný