Bestu paprikur í heimi!?

Ég var að koma úr Hagkaupum þar sem er verið að selja lífrænt ræktaðar paprikur frá Sunnu Garðyrkjustöð í pökkum af tveimur saman. Ég leit ekkert á verðið, enda varla geta paprikur kostað mikið, þó þær séu lífrænt ræktaðar og allt saman. Þetta hljóta að vera bestu paprikur fyrr og síðar (á eftir að prófa) því einn pakki kostar litlar 1229 kr! Síðan til að bæta gráu ofaná svart var mér meinað að skila vörunni, jafnvel þó ég hefði beðið um það strax, vegna reglna frá Heilbrigðiseftirlitinu. Ég vigtaði þessar paprikur sem reyndust vera um 300 g sem þýðir að kílóverðið er 4096 kr! Þeir hljóta að gefa paprikunum nautakjöt til að réttlæta þetta verð!
Kveðja,
Ívar

Bónusbrauð á Café Paris

Var að koma úr hjólatúr neðan úr bæ með tveggja ára dóttur mína. Settumst inn á Café Paris og ég pantaði (án þess að líta á matseðilinn) kaffi (regular), kókómjólk og ristaða brauðsneið með osti og smjöri fyrir dóttur mína. Ekki var það fleira í þetta skiptið. Þegar ég fer að borga og sé hvað þetta kostar er mér þó næstum öllum lokið. Fari það lóðbeina andskotans helsjóðandi leið í kjallara þess neðra að borga 590 kr fyrir ristaða brauðsneið úr Bónus. C´mon! Það er hugsanlegt að eigendur staðarins vilji flæma hjólandi vesturbæinga út af kaffihúsinu sínu, þó ég ætti erfitt með að sjá hvaða mótívasjón stæði þar að baki. Hugsanlega gæti ástæðan verið sú að hjólið sem ég kom á var blátt að lit. Það er í það minnsta jafn absúrd og verðið fyrir brauðið.
Baráttukveðjur,
Kristján Þór

Óánægður með Borgun

Fékk hringingu frá Borgun og var boðið "Almennt kort" sem átti víst að kosta 100 krónur á mánuði eða 1200 á ári. Ég sló til og fékk mér Almennt kort plús. Núna nokkrum mánuðum seinna fór ég að skoða yfirlitið og sá að maður borgar uppgjörs- og úrvinnslugjald upp á 345 krónur í hverjum mánuði ofan á 100 krónurnar!, semsagt kortið kostar 5340 kr á ári, en ekki 1200. Þegar hlutur kostar í raun 4,5x meira en auglýst verð gefur til kynna (kortið er auglýst á 100 krónur á heimasíður Borgunnar), þá er um alvarlegt svindl að ræða.
Annað kort sem Borgun býður upp á er American Express. Ef maður verslar við Atlantsolíu, Skeljung eða Orkuna eða notar á annað borð sjálfsala, þá er ekki ráðlegt að fá sér svoleiðis kort. Þú getur ekki einu sinni tengt þau við títt nefnda lykla frá þessum fyrirtækjum. Þú verður að versla við Olís eða N1 eins og mér var bent á af starfsmanni Borgunnar. Vildi bara láta fólk vita áður en það fær sér American Express kort, ekki gerir Borgun það.
Kv. Nafnlaus

Félagar óánægðir með nammisölu Sambós

Við félagarnir höfum farið reglulega í Sambó, nammiverksmiðjuna á Tunguhálsi, til þess að kaupa nammi. Þeir eru með lítið söluborð þar sem hægt er að kaupa óinnpakkað nammi. Um daginn fórum við þangað og ætluðum að kaupa okkur Þrista á góðu verði. Þar var okkur sagt að pokinn af þeim kostaði 550 krónur. Eitthvað fannst okkur þetta dýrt en ákváðum samt að kaupa okkur einn poka fyrst við vorum búnir að gera okkur ferð þangað. Þegar heim var komið ákváðum við þó að vigta pokann til að sjá hvert kílóverðið væri.
Pokinn var 400 grömm og kostaði 550 krónur.
Þetta þýðir að 1 kg kostar 1375 krónur.
Þá kom í ljós að það er dýrara en í þeim búðum sem við athuguðum síðar í. T.d. kostar kílóið 1192 krónur í Bónus, e-ð svipað í Krónunni og innan við 1300 krónur í Nettó. Okkur þykir bara undarlegt að óinnpakkað nammi beint úr verksmiðjunni sé dýrara en í helstu stórmörkuðunum. Svo voru viðtökurnar heldur dónalegar.
Takk fyrir,
A & G

Villandi kílóverð í Fiskikónginum.

Fiskikóngurinn Sogavegi auglýsir Humar á kr 2000 kr kg. Þetta er villandi því það er ekki til humar í þessari búð á kr 2000 kg. Það eru einungis 2 kg pakkningar í boði á þessu verði sem segi að það verður að borga 4000 kr ef ætlunin er að fá Humar á 2000 kr kg. Þetta kemur ekki í ljós fyrr en maður ætlar að versla.

Annað
Liðamín og lýsi frá Lýsi kostar rúmar 1700 kr í Krónunni, en 3400 í Garðsapóteki sem átti að vera svo ódýrt apótek. Hvað er það aftur sem var svo ódýrt í Garðsapóteki?
S.S.

Reiknivél PFS

Í dag var opnaður nýr vefur Póst- og fjarskiptastofnunar fyrir neytendur, Reiknivél PFS.
Vefnum er ætlað að auðvelda neytendum að átta sig á flóknum fjarskiptamarkaði og bera saman verð á þjónustuleiðum fjarskiptafyrirtækjanna fyrir heimasíma, farsíma og ADSL nettengingar. Reiknivél PFS tekur til algengustu innanlandsnotkunar á heimasíma og farsíma og niðurhals á gögnum erlendis frá með ADSL tengingum.
PFS

Naut eða gömul belja?

Ég er nú bara aðeins að velta vöngum yfir því hvort verið sé að segja viðskiptavinum ósatt eða hvort þetta skipti engu máli. En það er alltaf talað um að t.d. hamborgarar séu gerðir úr nautahakki, nautagúllas er til líka, nautalundir og alltaf eitthvað nauta nauta.
Ég þekki það nú ekki hvort það sé einhver munur á bragðinu en eflaust ekki því það sem ég er að reyna að segja að þegar maður borgað nautakjöt þá veit maður í raun aldrei hvort maður sé í raun að borða nautakjöt eða gamla belju.
Þetta er nú bara svona stutt pæling hjá mér, er í lagi að kalla allt nautakjöt bara nautakjöt þegar það er alveg pottþétt að það er mun líklegra að maður sé að borða gamla belju heldur en naut.
Bara stutt pæling um kjötiðnaðinn...
G. Á.

Reiðhjólahjámar fyrir börn

Ég fór á dögunum að kaupa reiðhjólahjálm fyrir son minn sem er 4 ára. Ég fór á marga staði að leita að barnahjámi. Flesta hjálma fann ég í Húsasmiðjunni, voru verðin þar á samll hjálmum frá kr. 4.990.- til kr. 7.990.- (þess má þó geta að tilboð var á hjálmum sem voru xx small á kr. 1.990.- en slíkir hjálmar passa aðeins mjög litlum börnum, eða köttum). Voru verðin í Húsasmiðjunni í takt við verðin á öðrum stöðum. -Okur
Ég fór í Europris og fann þar hjálma sem voru talsvert ódýrari og keypti þar mjög flottan og traustvekjandi hjálm á kr. 2.800.-
Maður veltir fyrir sér hvað býr í þessum rosalega verð mun.
kv,
Unnar

CNET segir ódýra kapla jafn góða og dýra

Mæli með að fólk lesi þetta. Ódýrir HDMI tölvukaplar eru alveg jafn góðir og fokdýrir.
Kveðja,
Trausti

Buy.is :o)

Langar bara að lýsa ánægju minni með þjónustu og verð hjá buy.is. Var að leita mér að minniskorti í farsíma og var búinn að vera að skoða á netinu hér heima og erlendis. Fæstir sendu hingað til lands þannig að ég ákvað að leita bara fyrir mér hér innanlands (enda mikilvægt að hlúa að verslun og þjónustu hér.)
Var að leita mér að 2GB korti, Síminn bauð kortið á 3490kr en Buy.is á 2490kr
Pantaði það og greiddi hjá Buy.is og fékk það í hendur að nokkrum dögum liðnum. Allt stóðst og ég var sáttur.
kv. Ívar

Soyamjólkin í Bónus

Heilsuhúsið selur soyamjólk natural kr 188, sama soyamjólk í Bónus kr 254.
Heilsuhúsið selur soyamjólk plus calcium á kr 283, sama soyamjólk í Bónus kr 254.
Hvað er á seiði, jú soyamjólk natural er mikið ódýrari í innkaupi og þess vegna ódýrari í Heilsuhúsinu.
Bónus notar hins vegar tækifærið og selur báðar tegundir á sama prís og fær ca kr 66 í bónus fyrir sig af ódýrari vörunni.
Ingibergur Elíasson

Apótekið "lægra verð"?

Ég fór í 3 apótek og skoðaði Nutrilenk 180 töflur:

Garðsapótek: 6.200 kr.
Apótekarinn: 6.440 kr.
Apótekið: 7.367 kr.

Ég hef ekkert verslað hingað til við Apótekið og það er greinilega ekki að fara að breytast.

Óska nafnleyndar

Næluokur Lyfju

Okkur hjónin vantaði öryggisnælur og fórum í Rúmfatalagerinn á Smáratorgi, en því miður voru þar allar öryggisnælur uppseldar. Fórum við þá í Lyfju í sama húsi og keyptum 12 nælur í kassa. Þetta voru stórar öryggisnælur nr. 4 framleiddar í Þýskalandi og hentuðu okkur vel. Við ákváðum að kaupa einn kassa, en þegar kom að því að borga brá okkur heldur betur. Verðið var 654 krónur eða sem svarar 54 krónum á stykkið. Þetta er okur sem við viljum koma á framfæri.
Guðmundur

Mælir með Réttingarverkstæði Hjartar

Svoleiðis er að ég lenti í smátjóni með bílinn minn um daginn og var bent á að fara á Réttingarverkstæði Hjartar á Smiðjuvegi 56 í Kópavogi. Fór þangað og þeir tóku bílinn strax og löguðu það sem þurfti að gera, skiptu um húdd, framrúðu, sprautuðu svolítið og svona. Lofuðu bílnum út á föstudegi og stóðu við það. Heyrðu, svo sæki ég bílinn eftir hádegi og varð heldur betur hissa, búið að sprauta frambretti og laga rispur og högg hingað og þangað sem ég hafði ekki beðið um. Borgaði minn reiking án þess að vera rukkaður aukalega fyrir það sem hafði verið gert aukalega. Geng glaður út í minn bíl og varð enn meira hissa, búið að þrífa bílinn hátt og lágt að innann!! Þjónusta sem ein og sér hefði kostað nokkra þúsundkalla á bónstöð. Frábær þjónusta í alla staði og ég mæli hiklaust með þessu verkstæði.
Baldur

Euroshopper/Bónus kjúklingabringur - Tilraun

Eftir að hafa keypt frosnar kjúklingabringur oft og þótt verð á þeim gott, þá tók ég ítrekað eftir því að þær rýrnuðu mjög mikið við eldun. Og í kjölfarið á því ákvað ég að gera tilraun (eins vísindalega og ég gat). Hún fólst í því að kaupa bringur af mismunandi tegundum, elda og sjá hvert raunkílóverð á þeim er. Til að reyna að gæta sanngirni og ná fram ágætis meðaltali keypti ég um 4kg af þessum tegundum. Hér á eftir fylgja niðurstöður fyrir fyrstu 2 tilraunirnar. Þess ber þó að minnast á að kílóverðið á Euroshopper kjúklingabringunum sem ég notaðist við gæti hafa breyst þ.s. ég gerði þann lið tilraunarinnar fyrir um ári síðan.

Euroshopper kjúklingabringur
Pakkningar: 4x1 = 4kg
Þiðinn kjúklingur: 3,54kg
Eldaður kjúklingur: 2,494kg
37,65% Rýrnun frá kaupmagni að elduðu magni
Raunkílóverð: 1495 * 1,3765 = 2058 kr/kg
* Miðað er við Euroshopper bringur í pokum á 1495 kr/kg

Bónus ferskar kjúklingabringur
Pakkningar: 0,848+0,834+0,832+0,826+0,870 = 4,21kg
Eldaður kjúklingur: 3,535 kg
16% Rýrnun frá kaupmagni að elduðu magni
Raunkílóverð: (1998*0,8) * 1,16 = 1854 kr/kg
* Miðað er við Bónus ferskar bringur í bökkum á 1998 kr/kg með 20% afslætti

Niðurstöður
Hér má sjá, að þó kílóverðið á Euroshopper bringunum virðist vera nokkuð lægra, þá eftir eldun breytist það allnokkuð í hina áttina. Bónus fersku bringurnar eru því um 204 kr/kg ódýrari en ES bringurnar.

Kv. Siguurður

Ísfrík óánægt með ísbúðina Ísland

Ég hef mjög gaman af því að fara og kaupa mér ís. Gamanið kárnaði þó
fljótt þegar ég fór í nýju ísbúðina í Suðurveri, Ísland og keypti mér
kúluís. 2 kúlur af séríslenskum skyrís frá Holtseli kosta tæpar 800 kr! Og
það kemur hvergi skýrt fram að sá ís sé mun dýrari en kúluísinn frá
Kjörís.
Rándýr ís og til að bæta gráu ofan í svart var þjónustan þarna algjör
hörmung.
Held mig núna við Ísbúð Vesturbæjar, sem er með sanngjarnt verð og alltaf
afbragðs þjónustu.
Með bestu kveðju,
Ísfrík

Mikill verðmunur á viðgerðum

Ég þurfti að skipta um bremsuklossa að aftan í bílnum mínum fyrir viku síðan. Og svo í dag (20-05-2010) datt mér í hug að fara með hann í skoðun, vegna þess að ég taldi ekkert vera að honum. En í bifreiðaskoðun komust þeir að því að bremsudiskarnir væru ónýttir að aftan og ég fékk endurskoðun. Altilagi með það ég verslaði mér bremsudiska og á leiðinni heim rifjaðist upp auglýsing sem ég heyri í útvarpinu þar sem Bílaáttan var að auglýsa sína þjónustu, ég rúllaði þangað með það í huga að biðja þá um að skipta um bremsudiska fyrir mig. Ég nennti því ekki. Ég fór þar inn og spurði hvað kostaði að skipta um þá bara taka gömlu úr og setja nýja í (ég tók fram að þetta væri bara að aftan) afgreiðslumaðurinn svaraði 26 þus og eitthvað. Mér brá og tuðaði aðeins í honum og sagði að það tæki mig ekki nema um 1 kls að skipta um þetta þeir væru sennilega svona ca 30 min að þessu með réttum búnaði. Þá sagði hann að það væri bara fast verð á þessu. Þá sagði ég við hann að ég geri þetta bara heima og verð á fínu tímakaupi við það og svo fór ég. Og aftur á leiðinni heim datt mér í hug að kíkja til Max 1 í Hafnarfirðinum. Ég bar upp sömu spurningu þar í afgreiðslunni og fékk til baka að þetta kostaði 6900 kr að gera þetta. Ég brosti bara og sagði honum frá fyrri staðnum og spurði hvort þetta væri örugglega rétt verð og hann sagði svo vera. Þá bað ég hann bara að taka bílinn minn og skipta um þetta og ég beið á meðan og þeir voru 30 min að þessu. En úr því að bíllin minn var komin þarna uppá lyftu hjá þeim þá bara bað ég hann um að smyrja hann fyrir mig og skipta um loftsíu og allt þar tilheyrandi.
Endaði ég að borga þarna hjá þeim 17.815 kr., þar af var 6900 fyrir skiptin á bremsudiskunum..

Mér finnst of mikill verð munur á þessum tveimur stöðum, annars vegar 26 þús og eitthvað og hitt verðið 6900 kr. Fyrie sömu vinnuna.

Annað nýlegt dæmi:
Mig vantar afturdempara í annan bílinn minn. Ég hringdi í Stillingu og verðið þar var 28 þus og eitthvað stk. Mér fannst það í hærri kantinum en ákvað að hringja í umboðið og spyrja hvað dempararnir kostuðu þar þar var mér sagt að stk kostaði 13 þus og eitthvað.. umboðið er Ingvar Helgasson. Ég fór upp í umboð og pantaði báða dempara hjá þeim og greiddi ég 22 þus og eitthvað fyrir þá með afslætti í umboðinu.

Virðingarfyllst,
F. E.

Tölvuvinir góðir!

Tölvan mín hætti nú bara að vilja starta sig upp einn daginn svo ég fór með hana til Tölvuvina (http://tolvuvinir.is/) Í stuttu máli gerðu þeir við hana, hratt og vel, og voru sanngjarnir í verðum og einstaklega liprir og góðir. Mæli með Tölvuvinum!
Lalli

Útrunnið blek í Þór hf.

Keypti 2 blekhylki í Epson 2100 prentara í Þór hf. Ármúla áðan.
Láðist að líta á dagsetninguna en þegar ég kom með það heim sá ég að
annað hylkið var löngu útrunnið, dagsett 08.2009. Hylkið var á fullu
verði, um 4.300 kr. f. 17 ml hylki! Ef þetta væri í fyrsta skipti sem
ég fengi útrunnið blek hjá þessari verslun væri þetta hugsanlega
afsakanlegt, en svo er ekki. Þeir hafa ítrekað reynt að selja mér (og
fleirum skv. smá Gúgli) útrunnið blek án þess einu sinni að vekja
athygli á því að það væri útrunnið eða bjóða afslátt. Í samtölum við
starfsmenn hefur komið fram að þetta eru ekki mistök heldur eru þeir
að selja útrunnið blek vitandi að það er útrunnið. Halda því blákalt
fram að það sé allt í lagi með blekið þó það sé útrunnið fyrir nærri
ári síðan.
Margir spara við sig prentun núna þar sem blekið er ofurdýrt og því
liggur sama hylki vafalaust hjá sumum í prentaranum í ár frá kaupum
og eins líklegt að það eyðileggi prentarann á þeim tíma þó það væri
mögulega í lagi þegar það var sett í. Sambærilegur prentari við minn
kostar um 200 þús. og útilokað fyrir mig að sýna fram á þeirra ábyrgð.

Kveðja,
Friðrik Friðriksson

Vodafone okur í Ameríku

Í kjölfar fréttar um verðskrár á farsímamarkaði þá sendi ég póst á fréttastofu RÚV um samskipti mín við Vodafone í kjölfar ferðalags til Bandaríkjanna, en verðskrá félagsins í Bandaríkjunum er alveg svívirðileg. RÚV hefur ekki gert neitt með þetta, en ég tel þetta eiga erindi til almennings.
Ég átti í samskiptum við Jóhann Másson framkvæmdastjóra fyrirtækjasviðs hjá Vodafone vegna þessa, en hann hafði lítinn áhuga á því að breyta stöðunni.
Samskipti okkar hófust eftir að ég fékk reikning vegna farsímanotkunar í Bandaríkjunum. Mér þótti fátt um skýringar Jóhanns, einkum þegar litið er til samanburðar á verði viðskiptavina Vodafone á Íslandi og viðskiptavina Vodafone í Bretlandi, en þar munar rösklega 150 krónum á mínútu á verðskrá notenda á ferðalagi í Bandaríkjunum.
Vodafone Ísland 2,24 Evrur mínútan, Vodafone Bretland 1,35 Evrur mínútan, hringt innan eða frá BNA.
Þá leitaði ég að dýrustu símtölum landsins. Þar lá beinast við að leita að svokölluð virðisaukandi númerum, 900 númerum. Dýrustu símtölin eru ýmis söfnunarnúmer, en þau hafa það sammerkt að ein tilgreind upphæð er gjaldfærð á símareikning þess síma sem hringt er úr. Geta upphæðir numið frá kr. 1.000 allt að kr. 5.000.
Dýrustu símanúmer sem ég fann sem innheimt eru samkvæmt tímamælingu eru 900 númer með kynlífsspjalli hjá Rauða torginu, en dýrustu símtölin þar samkvæmt verðskrá á vefsíðu þeirra eru kr. 299 á mínútu.
Sammerkt með öllum 900 númera þjónustum er að tilgreint er áður en símtal hefst hvað það kostar. Er það gert samkvæmt 5. mgr. 38. gr. laga um fjarskipti nr. 81/2003:
„Ef símtöl bera yfirgjald skal þjónustuaðili ávallt geta þess í upphafi símtals hver fjárhæð gjaldsins sé. Áskrifandi skal eiga þess kost að læsa fyrir símtöl í númer þar sem tekið er yfirgjald. Nánar skal kveðið á um símtöl og aðra virðisaukandi þjónustu í [tal- og farsímanetum]1)með yfirgjaldi í reglugerð.“
Samkvæmt skilgreiningu 3. gr. laga nr. 81/2003 - Yfirgjald: Gjald fyrir virðisaukandi þjónustu sem er hærra en almennt símtalagjald.
Hér má vitaskuld fara í hártoganir um skilgreiningu á virðisaukandi þjónustu, en ég lít svo á að það sé virðisaukandi þjónusta að sjá um greiðslumiðlun fyrir erlend símafélög, því fæ ég ekki betur séð en að lögum samkvæmt þurfi símafélögin að geta í upphafi hvers símtals í útlöndum hver fjárhæð gjaldsins sé. Það dugi ekki að geta þess einhversstaðar djúpt á heimasíðu, þar sem mínútuverð er gefið upp í Evrum, sem mig grunar að sé ólöglegt, en það er önnur saga.
Að lokum, það var vegna okurs eins og þess sem kemur fram hér að neðan sem Evrópuþingið setti lög sem takmarka verðskrá símafélaga á milli landa innan sambandsins. Ekki hefur verið tekið á þessu gagnvart Bandaríkjunum, en engar líkur eru á því að símafélögin ríði á vaðið með þetta sjálf á meðan skepnan verpir gulleggjum.
kk,
Sigurður Ingi Jónsson

Hvað er málið með Subway?

Hvað er málið með bát mánaðarins á Subway?
Lítill skinkubátur kostar 479kr og stór 769kr þannig hlutfallslega er ódýrara að fá sér stórann bát.
Núna er skinkubátur bátur mánaðarins og kostar því 379kr, og stór 758kr. Þarna sparaði ég heilar 11 krónur á að fá mér stórann bát, hlutfallslega miklu hærri afsláttur á litla bátnum. Hver er pælingin á bak við þetta? Maður klórar sér bara í hausnum. Ætti stóri báturinn ekki að lækka hlutfallslega í verði í samræmi við littla bátinn?
Stór grænmetissæla kostar 739kr á venjulegum degi og hlýtur þar að leiðandi að vera dýrari þegar sá bátur er bátur mánaðarins, snilldar framtak.....aðeins á Íslandi!
Kveðja,
Siggi

Sushi Quatro

Þá er það blessað sushiið.
Gæði og verð fara greinilega ekki alltaf saman í þeim bransa.
Keypti í gær bakka í Sushismiðjunni á Geirsgötu, 7 bitar á 1.400 krónur. Það var ekkert sérstaklega gott sushi fyrir allan þann pening.
Á Fiskmarkaðnum í Aðalstræti er hinsvegar hægt að fá fín hádegistilboð. T.d. 14 bita af sushi og sashimi fyrir 1.490 krónur. Þar er verið að bjóða toppgæði inná veitingastað með þjónustu. Mæli með að fólk skoði það.
Að láta okra á sér í Sushismiðjunni þegar jafn stutt er í Fiskmarkaðinn ætti enginn að gera. Tek fram að ég hef engra hagsmuna að gæta nema eigin bragðlauka og buddu.
Ingibjörg.

Dýrir smokkar - hvað er til ráða?

Þannig er mál með vexti að smokkar eru ekki beinlínis ódýrir á landinu,
það telst heppni ef maður fær 12 smokka á innan við 2000 kallinn og sá
möguleiki er einungis fyrir hendi með sumar tegundir (það er ekki ókeypis
að gera það, allavega ekki ef maður hefur verjur. Það telst held ég gott
að sleppa með innan við 200 kall skiptið...). Bónus er að vísu með
einhverjar nokkrar tegundir (og nokkuð ódýrar) en engar af þeim sem ég hef
notað, yfirleitt bara einhverjar þrjár hefur mér sýnst.
Þannig að ég var að velta fyrir mér hvort eitthvað hefði birst um þetta á
síðunni og ef ekki held ég að það væri sniðugt. Það er örugglega fullt af
fólki sem tekur einhverja sénsa í stað þess að nota alltaf smokk því þeir
eru svo dýrir. Apótekin er einu staðirnir sem hafa eitthvert úrval og þar
eru þeir rándýrir eins og allar aðrar vörur í apóteki. Hagkaup fær reyndar
prik fyrir að eiga nokkuð af smokkum og á lægra verði en apótekin (sem ég
hef farið í) eru með.
Ég lendi hinsvegar alltaf í því í Hagkaupum þegar ég versla smokka að
verðið er kolvitlaust. Merkt verð á stórum pakka af Fetherlite er 1499 en
maður er látinn borga 1799. Þetta hef ég ítrekað þurft að láta leiðrétta.
Það virðist enginn gefa þessu gaum opinberlega, eru Íslendingar ennþá jafn
bældir? Það væri þjóðráð að gefa annaðhvort smokka eða niðurgreiða þá.
kv., Einn graður

Garðsapótek áberandi ódýrara

Ég gerði verðsamanburð á Implanon (hormónastafurinn) í dag og Garðsapótek (Sogavegi 108) er áberandi ódýrara en hin apótekin sem ég hringdi í. Þetta apótek hefur alveg farið fram hjá mér hingað til en ég mun pottþétt athuga lyfjaverð þarna næst.

Garðsapótek 27.146.-
Rima apótek 30.659.-
Lyfjaver 31.117.-
Skipholtsapótek 31.370.-
Apótekarinn 31.596.-
Apótekið 31.666.-

Kv. Linda

Elko okra á minniskorti

Ég ákvað að leita mér að minniskorti af gerðinni MemoryStick Pro Duo. Sony er upprunalegi framleiðandinn og þ.a.l. dýrari en hinir sem kannski eðlilegt er.

Ég fann hjá ELKO 8GB útgáfu frá Sony á 19.995 ISK (eða 20.000 kall – 5 kall). Fannst mér þetta í dýrari kantinum svo ég ákvað að kíkja á norska síðu sem ég verslaði af þegar ég bjó þar. Fann ég nákvæmlega sama kortið á 362 NOK eða miðað við gengi dagsins, ca 8.000 ISK. Ég hélt nú áfram að reikna mig fram og fann út að það var ódýrara að kaupa af þeim í Noregi, senda það hingað, borga toll og Vask ofan á verðið frá noregi sem er líka með vask. Ef ELKO hefur ekki slysast til að smella 1 fyrir framan verðið, þ.e.a.s. að verðið á að vera 9.995 þá er þetta skólabókardæmi um okur, græðgi og hvernig fyrirtæki í „Samkeppni“ velta misheppnuðu fjárfestingum og rekstrartapi yfir á neytandann.

Heimild:
ELKO lnkur

PS Data linkur