Fákeppni eða einokun í bíladrætti

Tengdamóðir mín, sem er öryrki, lenti í því að bíllinn hennar bilaði á aðrein frá Snorrabraut inn á Miklubraut síðasta föstudag. Bíllin var dreginn burt á laugardeginum. Ég vissi ekki af þessu fyrr en á sunnudeginum og þá var allt lokað í Vöku. Þegar ég hringdi eftir helgina þá fékk ég að vita að það hefði kostað 9.800 kr að láta draga bílinn og ofan á það bættist 2.980 kr. afgreiðslugjald og dagsektir sem væru 1.494 kr á dag. Tengdamóðir mín hafði ekki efni á því að leysa bílinn út og því safnast áfram dagsektir á hann. Í dag stendur þetta í um 20.000 kr.
Það sem mér finnst ekki í lagi er að fólk hefur ekki hugmynd um það hvað þetta kostar og engin viðvörun er gefin áður en bíllinn er dreginn.
Vaka er ekki með gjalskrá á heimasíðunni sinni og þar af leiðandi er ekki hægt að sjá hvað það kostar að bíllinn sé dreginn, að það sé afgreiðslugjald og að dagsektir séu 1.494 kr. Þar að auki er ekki sjálfsagt að allir viti að það sé Vaka hf sem hefur dregið bílinn.
Það er ekkert val um það hvaða fyrirtæki dregur og þar af leiðandi gæti Vaka alveg eins látið dráttinn kosta 20.000 og haft afgreiðslugjaldið 10.000 og dagsektirnar 3.000 eða enn hærri upphæðir.
Tengdamóðir mín hringdi í Vöku og spurðum hvort hægt væri að sækja bílinn og fá sendan gíróseðil en það er ekki hægt. Það verður að greiða alla upphæðina þegar bíllinn er leystur út. Að öðrum kosti safnar hann dagvöxtum þangað til fólk hefur efni á því að leysa hann út.
Ég sendi þessa línu þar sem mér finnst þetta ósanngjarnt og þetta er eitthvað sem flestir hafa sennilega ekki hugmynd um.
Jóhann