Dýrt nammi í (Sam)bíóum

Við hjónin skelltum okkur á Inception í Kringlubíói í kvöld. Miðarnir á 650 kr.
stk (Þriðjudagstilboð). Fór síðan og keypti 1/2 ltr. af Topp og 1/2 ltr. af Coke Zero. Fyrir þetta mátti ég reiða fram 720 kr! Miðstærð af poppi, 10 karamellur og 1 lítið súkkulaði, samtals 1650 kr. Er ekki í lagi með þetta lið? Hversu mikið þarf það að græða á fólki? Bíóferðin á þriðjudagskvöldi endaði semsagt í 3000 kr.! Maður er hættur að skilja, eru engin mörk á græðgi fólks. Hvernig stendur á því að það þarf að leggja fleiri hundruð prósent á þessar vörur? Læt mér nægja í framtíðinni að fara í Krambúðina á Skólavörðustíg og leigja þar nýjustu spólurnar á 300 kr. stk. og kaupi svo gos og snakk í Bónus. Þannig fer bíókvöldið ekki yfir 1000 kr. Fólk á ekki að versla við svona lið. Ég mæli með því að fólk kaupi sér gos, popp og nammi áður en það fer í bíó, þetta er bara rugl.
Kveðja,
Jakob Aðils og Guðrún H.A. Eyþórsdóttir

Félagar óánægðir með nammisölu Sambós

Við félagarnir höfum farið reglulega í Sambó, nammiverksmiðjuna á Tunguhálsi, til þess að kaupa nammi. Þeir eru með lítið söluborð þar sem hægt er að kaupa óinnpakkað nammi. Um daginn fórum við þangað og ætluðum að kaupa okkur Þrista á góðu verði. Þar var okkur sagt að pokinn af þeim kostaði 550 krónur. Eitthvað fannst okkur þetta dýrt en ákváðum samt að kaupa okkur einn poka fyrst við vorum búnir að gera okkur ferð þangað. Þegar heim var komið ákváðum við þó að vigta pokann til að sjá hvert kílóverðið væri.
Pokinn var 400 grömm og kostaði 550 krónur.
Þetta þýðir að 1 kg kostar 1375 krónur.
Þá kom í ljós að það er dýrara en í þeim búðum sem við athuguðum síðar í. T.d. kostar kílóið 1192 krónur í Bónus, e-ð svipað í Krónunni og innan við 1300 krónur í Nettó. Okkur þykir bara undarlegt að óinnpakkað nammi beint úr verksmiðjunni sé dýrara en í helstu stórmörkuðunum. Svo voru viðtökurnar heldur dónalegar.
Takk fyrir,
A & G

Dýrara í Fríhöfn en Bónus

Ég vil benda á okurverð á sælgæti í fríhöfninni m.v. verslanarnir í landinu.
Það er alveg með ólikindum að borga meira fyrir sælgæti í fríhöfninni þar sem eru hvorki VSK eða vörugjöld en í almennri verslun.
Ég keypti Mackintosh box, 675 gr í fríhöfninni sem kostar 1.999 kr (ennþá svona skv. vefsíðu þeirra) en ég sé í Bónus auglýsingu í morgun að Mackintosh box, 1,1 kiló kostar 1.598 kr hjá þeim.
Mér finnst að það sé svindlað á neytendum sem hugsa að það er auðvitað ódýrara í fríhöfninni þar sem það er „tax-free“. En svo er það ekki í raun. Það væri fróðlegt að reikna hvað þau setja mikla álagningu á þessar vörur.
Mér finnst rétt að birta þetta til að vekja athygli landsmanna á þessum neytandasvikum!
Takk,
Caroline

Nammiokur Europris

Uppáhaldsnammið mitt er non stop frá freia og fæst það bara í europris. ég keypti mér einn poka í gær og er hann 250gr og kostaði pokinn litlar 899 kr. hvernig er hægt að selja svona litlan poka á svona mikið???
kv. sigrún

Bland í poka

Hér er smá ábending til BARNA og foreldra þeirra. Bland í poka kostar hjá flestum matvöruverslunum 1990 kr/kg. - 50% á nammidögum.( hef séð 2400 kr/kg )
Þessi vara er seld ópökkuð eins og allir vita. Ef þessi sama vara er pökkuð er verð á 1 kg mjög gjarnan 1000 - 1100 kr/kg alla daga og þá á flestum stöðum.
Hef séð verð sem eru 780 kr/kg á pökkuðu hlaupi íslensku. Bendum börnunum á þetta þegar farið er að kaupa nammi á nammidögum.
Kveðja, Júlli